Украінскія камуністы заступіліся за беларускіх алігархаў

Лідар украінскіх камуністаў запатрабаваў не ўводзіць мыты на беларускія нафтапрадукты.

Гэты крок, на думку Пятра Сіманенкі, можа спрычыніцца да зрыву пасяўной кампаніі ва Украіне, піша РБК.

«Хутка трэба будзе сеяць, а значыць, сельгастэхніцы выходзіць у поле. Але ў выпадку забароны імпарту беларускіх нафтапрадуктаў, пасяўная кампанія можа стацца пад пагрозай зрыву. Бо паўстане дэфіцыт з нафтапрадуктамі, напрыклад, з саляркай, нафтатрэйдары падвысяць кошты, і нашым сялянам нічога іншага не застанецца, як пераплачваць», - заявіў Пётр Сіманенка.

Дэпутат нагадаў, што ва Украіну менавіта з Беларусі завозяцца танныя нафтапрадукты, якімі забяспечваюць краіну. На думку лідара КПУ, мыты з боку Украіны не толькі ўдараць па эканоміцы, але і паўплываюць на пахаладанне ў стасунках дзвюх краін.

Міністэрства энэргетыкі і вугальнай прамысловасці Украіны зноў вывучае магчымасць увядзення мыт на ўвоз нафтапрадуктаў. Іх рэалізуюць тры кампаніі: «Юнівест-М», «Петратранс» і «Інтэрсэрвіс». Паводле інфармацыі ўдзельнікаў рынку, прасоўванне гэтага віду паліва пралабіяваў уласнік «Юнівест-М» Анатоль Цярнаўскі, у якога ёсць інтарэсы і ва Украіне.

Нагадаем, супраць яго і ўладальніка «Трайпла» Юрыя Чыжа ЕЗ увёў эканамічныя і візавыя санкцыі за падтрымку рэжыму Лукашэнкі.