Украіна можа экстрадаваць экс-прэм'ера Таджыкістана

Шаўчэнкаўскі раённы суд Кіева дастасаваў да былога прэм'ер-міністра Рэспублікі Таджыкістан Абдумаліка Абдуладжонава экстрадыцыйны арышт.

Ён будзе ўжыты да развязання пытання аб ягонай перадачы праваахоўным органам Таджыкістана, на пастанову якіх ён быў абвешчаны ў міжнародны вышук. Такім чынам, суд задаволіў прадстаўленне пракуратуры Кіеўскай вобласці, якая намагала ўжывання гэтай меры ў дачыненні да былога кіраўніка ўрада Таджыкістана, піша УНІАН.

Нагадаем, 5 лютага ў міжнародным аэрапорце «Барыспаль» быў затрыманы Абдумалік Абдуладжонаў, які быў апанэнтам прэзідэнта Таджыкістана Эмамалі Рахмона на выбарах 1994 года. Затрыманне адбылося, калі А.Абдуладжонаў прыбыў ва Украіну з ЗША. На радзіме А.Абдуладжонава вінавацяць у замаху на Э.Рахмона ў 1996 годзе і прычыннасці да паўстання ў 1998 годзе. Паводле звестак Інтэрпола, А.Абдуладжонаў знаходзіўся ў вышуку як асоба, прычынная да арганізаваных транснацыянальных злачынных груп і тэрарызму. На працягу апошняга дзесяцігоддзя А.Абдуладжонаў жыў у ЗША. У сваім апошнім інтэрв'ю радыё «Свабода» ён сцвярджаў, што сапраўды перамог на выбарах у 1994 годзе, і прэзідэнт Э.Рахмон незаконна абвясціў сябе пераможцам. У лютым Генеральная пракуратура Таджыкістана накіравала ў Кіеў запыт аб экстрадыцыі былога прэм'ера. Праваабарончая арганізацыя Amnesty International і Рэгіянальнае прадстаўніцтва Управы Вярхоўнага камісара ААН у справах уцекачоў заклікалі ўлады Украіны не выдаваць А.Абдуладжонава Таджыкістану.