Маці-адзіночка паўгода спрабуе даказаць катаванні ў РУУС

Актывістка Беларускай Хрысціянскай Дэмакратыі Вольга Пансевіч сутыкнулася з кругавой парукай.

21 красавіка 2012 года слонімская актывістка была затрыманая ў двары свайго дома супрацоўнікамі міліцыі. Пры затрыманні яе моцна збілі, пасля чаго гвалтоўна запіхнулі ў машыну і адвезлі ў Слонімскі РАУС, дзе склалі два пратаколы аб адміністрацыйных правапарушэннях за хуліганства і непадпарадкаванне супрацоўнікам міліцыі.

Трое сутак актывістку пратрымалі ў ІЧУ Слонімскага РАУС, дзе супрацоўнікі ІЧУ над ёй здзекаваліся, збівалі і рабілі так званую «ластаўку», піша protivpytok.org.

Вольга Пансевіч больш за паўгода спрабуе даказаць прымяненне катаванняў, але ўсё дарэмна. Пакуль над дзяўчынай здзекаваліся супрацоўнікі міліцыі і ІЧУ, дома ў яе заставалася непаўналетняе дзіця, якое чакала прыходу мамы.

Праверку па скарзе жанчыны, на дзеянні супрацоўнікаў міліцыі, праводзіў Слонімскі раённы аддзел Следчага камітэта і прадказальна вынес пастанову аб адмове ва ўзбуджэнні крымінальнай справы. Следчы па гэтай справе, нават не знайшоў час выклікаць сведак, а абмежаваўся толькі паказаннямі супрацоўнікаў міліцыі.

У цяперашні час, Вольга не верачы ні пракуратуры, не следчаму камітэту, звярнулася па дапамогу ў суд Слонімскага раёна.

У скарзе ў суд Слонімскага раёна, паказваюцца не толькі множныя недахопы праверкі Следчага камітэта, але і некаторыя нестыкоўкі ў паказаннях усё тых жа супрацоўнікаў міліцыі:

«Так, з тлумачэнняў старэйшага аператыўнага дзяжурнага Слонімскага РАУС Боціка Д.Ф. вынікае, што я была дастаўленая ў Слонімскае РАУС каля 20.00. У той жа час супрацоўнікі ППСМ УУС Гродзенскага аблвыканкама Зіневіч С.П., Быцко Е.Г. сцвярджаюць, што прыкладна ў 20.00 яны мяне ўбачылі на вул. Хлюпіна. Незразумела, якім чынам я ў адзін і той жа час магла знаходзіцца ў розных месцах. Дадзены факт пацвярджае, што праверка па маёй заяве была праведзеная нядбайна і нядбала, а высновы, зробленыя пры вынясенні пастановы аб адмове ва ўзбуджэнні крымінальнай справы не з'яўляюцца аб'ектыўнымі».

У канцы сваёй скаргі Вольга просіць суд адмяніць пастанову аб адмове ва ўзбуджэнні крымінальнай справы, вынесеную старэйшым следчым Слонімскага раённага аддзела Следчага камітэта Р.У. Валадашчыкам і абавязаць выправіць дапушчаныя парушэнні.

У сваіх дзеяннях адзінокая маці гатовая дайсці і да Камітэта ААН па правах чалавека і ўжо там даказваць прымяненне катаванняў у дачыненні да яе.