Зміцер Шэпелеў: Тое, што з'ехаў не я адзін, - гэта сімптом
64- 27.03.2013, 20:49
Былы беларускі журналіст Зміцер Шэпелеў усё часцей сустракае сваіх былых калег у Кіеве і Маскве.
Аб гэтым журналіст распавёў у інтэрв'ю ўкраінскаму парталу mignews.com.ua.
«Я памятаю, як мне крычалі некаторыя з маіх калегаў, калі я ад'язджаў працаваць у Кіеў: «Што, пацук, бяжыш? Пасунуўся па вялікія грошы? Ну і едзь, перабежчык!» І што вы думаеце? Усіх без выключэння гэтых людзей праз нейкі час я сустрэў у Кіеве ці Маскве. А тое, што з'язджаю не адзін я, на жаль, ужо сімптом», - кажа Зміцер Шэпелеў.
Журналіст распавёў, што працаваць на тэлевізіі ў Беларусі немагчыма.
«На жаль, мне там няма чым займацца, бо там няма камерцыйнай тэлевізіі - толькі дзяржаўная», - сказаў ён.
Таксама Зміцер Шэпелеў, які жыве ў Маскве ўжо пяць гадоў, прызнаўся, што яму не раз прапаноўвалі расейскае грамадзянства.
«Мае бліжэйшыя сябры - з Менску, з якімі я рос і вучыўся ва ўніверсітэце. Ёсць парачка журналістаў яшчэ з Кіева, з кім я пасябраваў за ўвесь час працы тут. Масквічом сябе не адчуваю, больш за тое, не адчуваю сябе нават расейцам. Я не планую адмаўляцца ад беларускага грамадзянства, нягледзячы на тыя складанасці, якія маю ад свайго сіняга роднага пашпарта. Не буду хаваць, мне прапаноўвалі прыняць расейскае грамадзянства, але я адмовіўся, таму што для мяне гэта прынцыпова», - сказаў ён.
У Беларусі журналіст працаваў на «Альфа-радыё» і на Беларускай тэлевізіі. Потым ён перабраўся ва Украіну, а затым - у Расею.