Гандаль зброяй закрылі ад «выпадковых» гульцоў

Улады вырашылі падстрахавацца ў гандлі зброяй і таварамі двайнога прызначэння.

Гэта вынікае з Указа 104, якім уносяцца дапаўненні ва Указ «Аб мерах дзяржаўнага рэгулявання ўвозу і вывазу спецыфічных тавараў (работ, паслуг)» ад 17 ліпеня 2006 года.

Згодна з дакументам, устанаўліваюцца новыя правілы ў парадак вызначэння і ліцэнзавання тавараў і тэхналогій двайнога прызначэння, якія могуць быць выкарыстаныя для стварэння ўзбраенняў і ваеннай тэхнікі. Указ падпісаны Лукашэнкам 4 сакавіка 2013 года.

Паўнамоцтвамі для вызначэння адпаведных тавараў надзеленыя Аператыўна-аналітычны цэнтр пры кіраўніку Беларусі. У прыватнасці, яму даручана правядзенне ідэнтыфікацыі «тавараў і тэхналогій двайнога прызначэння, якія могуць быць ужытыя пры стварэнні ўзбраенняў і ваеннай тэхнікі, калі такія тавары і тэхналогіі прызначаныя для крыптаграфічнай абароны інфармацыі, якая не змяшчае звестак, аднесеных да дзяржаўных сакрэтаў».

Ліцэнзаванне пасярэднікаў у гандлі даверана Дзяржаўнаму ваенна-прамысловаму камітэту.

«Парадак выдачы ліцэнзій на ўвоз прадукцыі ваеннага прызначэння, тавараў (работ, паслуг), якія кантралююцца, на вываз спецыфічных тавараў (работ, паслуг), на аказанне юрыдычнымі асобамі Рэспублікі Беларусь пасрэдніцкіх паслуг, звязаных з перамяшчэннем (пастаўкай) спецыфічных тавараў з адной замежнай дзяржавы ў іншую (далей - ліцэнзіі), уключаючы парадак выдачы іх дублікатаў, унясення змяненняў і (або) дапаўненняў у ліцэнзіі, прыпынення, аднаўлення дзеяння ліцэнзій, іх адклікання і анулявання, вызначаецца Дзяржаўным ваенна-прамысловым камітэтам па ўзгадненні з Дзяржаўным мытным камітэтам», - гаворыцца ў дакуменце.

ААЦ і Дзяржаўнаму ваенна-прамысловаму камітэту даручана ў трохмесячны тэрмін падрыхтаваць адпаведныя дакументы і зацвердзіць парадак фарміравання пасярэднікамі базы дадзеных замежных контрагентаў.