Знайшоў замену
137- 8.03.2013, 20:05
Лукашэнка сустрэўся сёння ў Каракасе з прэзідэнтам Балівіі Эвам Маралесам.
Яны абодва знаходзяцца ў сталіцы Венесуэлы для ўдзелу ў жалобных акцыях з нагоды скону Уга Чавэса, паведамляе БелТА.
«Я ніколі не думаў, што сустрэнемся тут пры гэткіх абставінах. Мы вельмі шмат з Угам Чавэсам размаўлялі пра тваю краіну. Мы нават выпрацавалі план супольных дзеянняў, і цяпер нам давядзецца з табой прадоўжыць гэтую справу - сказаў Лукашэнка. - Я вельмі спадзяюся і практычна ўпэўнены ў тым, што ў Венесуэле будзе абраны прэзідэнт, які абавязкова разам з намі будзе рэалізоўваць задумкі Уга Чавэса».
«Хачу цябе запэўніць у тым, што Беларусь зробіць усё для таго, каб наладзіць з Балівіяй такія ж стасункі, як з Венесуэлай», - падкрэсліў Лукашэнка.
У сваю чаргу Эва Маралес заявіў аб гатовасці развіваць дзвюхстароннія дачыненні з Беларуссю. «Дзякую за сустрэчу і спадзяюся, што яна паспрыяе гэтаму», - адзначыў ён.
Нагадаем, смерць Уга Чавэса надышла 5 сакавіка а 16.25 паводле мясцовага часу. На ягонае пахаванне прыехалі блізу 20 кіраўнікоў дзяржаў. Лукашэнка - адзіны кіраўнік еўрапейскай краіны, які наведаў Каракас сёння. У сталіцу Венесуэлы ён прыехаў разам са сваім малодшым сынам Мікалаем.
Прэзідэнцкія выбары ў Венесуэле павінны адбыцца на працягу месяца.