Луўр зачыніўся з-за забастоўкі персаналу

Самы наведвальны музей планеты - парыжскі Луўр - у сераду апынуўся зачынены для наведвальнікаў з-за забастоўкі персаналу, які абураны ростам ліку кішэннікаў у музеі.

У забастоўцы ўзялі ўдзел каля 200 супрацоўнікаў музея, якія забяспечваюць бяспеку і прыём наведвальнікаў. Па словах удзельнікаў акцыі, у апошні час кішэннікі сталі сапраўднай бядой Луўра: іх становіцца ўсё больш і вядуць яны сябе ўсё больш агрэсіўна, прычым ад дзеянняў зламыснікаў пакутуюць не толькі наведвальнікі музея, але таксама і яго супрацоўнікі, піша РІА «Новости».

У сераду каля 100 работнікаў Луўра з ліку тых, якія падтрымалі акцыю, сабраліся на мітынг каля французскага міністэрства культуры, каб выказаць сваю незадаволенасць і запатрабаваць узмацнення мер бяспекі.

Па словах прадстаўніка аднаго з прафсаюзаў, людзі хочуць ведаць, да якога часу яны будуць вымушаныя выходзіць на працу са страхам апынуцца перад тварам арганізаваных банд з агрэсіўна настроеных кішэннікаў, у тым ліку непаўналетніх, якія бясплатна праходзяць у музей і якіх паліцыя адпускае праз некалькі дзён пасля таго, як яны папаліся на месцы злачынства.