Карупцыя ў Берасці: элітныя катэджы замест рамонту дарог

Грошы, прызначаныя для рамонту асфальтавага пакрыцця, пайшлі на будоўлю катэджнага паселішча пад Берасцем.

Новы карупцыйны скандал, які разгараецца ў абласным цэнтры, выкліканы парушэннямі пры размеркаванні 17 мільярдаў рублёў бюджэтных сродкаў. Яны павінны былі пайсці на асфальтаванне цэнтральных вуліц горада. Аднак, улічваючы тое, што яны па-ранейшаму знаходзяцца ў жудасным стане, жыхары ўпэўненыя, што буйная сума беспакарана перайшла ў кішэні неахайных выканаўцаў.

Старшыня гарвыканкама Берасця Аляксандр Палышанкоў абяцае штогод «з толкам» укласці 17 мільярдаў рублёў бюджэтных грошай у так званы «ямачны рамонт» вуліц. Пры гэтым, як стала вядома charter97.org, манапалістам вытворчасці асфальту з'яўляецца група кампаній «СТіМ». Таму мільярды рублёў на рамонт трапляюць менавіта гэтаму паспяховаму прадпрыемству. Вынік работ, якія былі праведзеныя ўсяго год таму можна бачыць на фота.

Зэканомленыя на вытворчасці няякаснага асфальту сродкі кіраўніцтва «СТіМ» уклала ў прадмесце «Сцімава» - элітнае катэджнае паселішча, якое будуецца на ўездзе ў Берасце з боку Менску.

Для яго будавання ўлады канфіскавалі з сельгасужытку 29,63 га ворных земляў. Рынкавы кошт гэтага зямельнага надзелу складае прыкладна шэсць мільёнаў даляраў. Ці кампенсавала кампанія «СТіМ» страты ў сувязі з тым, што забрала сельгасзямелю - невядома.

Грошы на аднаўленне няякасна выкананых дарожных работ, хутчэй за ўсё, пры адзінагалоснай падтрымцы «дэпутатаў» гарсавета, улады выдзяляць з бюджэту за кошт скарачэння і так малых выдаткаў на ахову здароўя.

Сплата вінаватымі асобамі прычыненай шкоды праз няякасна выкананыя работы ўкладкі асфальту ўладамі не разглядаецца.