У Бабруйску ямы на дарогах закладваюць цаглінамі
43- 16.04.2013, 9:27
Выбоіны і ямы на вуліцах райцэнтра рамантуюць з дапамогай цэглы.
Многія жыхары горада з сумам заўважаюць, што Бабруйск можа ўзначаліць спіс месцаў Беларусі з самымі разбітымі дарогамі, піша onliner.by.
У некаторых месцах раённага цэнтры праезная частка запар складаецца з выбоін і калдобін рознага памеру і глыбіні. Можна не сумнявацца, што многія падпадаюць пад праславуты дзяржстандарт СТБ 1291, у якім прапісаны патрабаванні да дарожнага пакрыцця і, згодна з якім, крытычнай ямай лічыцца ўтварэнне ў дарожным палатне памерам больш за 0,3 на 0,3 метра і глыбінёй больш за 5 см.
На некаторых вуліцах ямы закладзеныя цаглінамі. Пры гэтым адпаведныя знакі (напрыклад, «Няроўная дарога») не ўсталяваныя.
У Бабруйскім гарвыканкаме чыноўнік, які курыруе кірунак, адмовіўся даць каментар па тэлефоне. Пры гэтым ён не стаў адмаўляць, што ямы закладзеныя цаглінамі. Мясцовыя дарожнікі паведамілі, што гэта часовая мера і яна «ўжывалася ў дачыненні да крытычнай ямачнасці». Па іх словах, намечаны рамонт многіх вуліц, і ў бліжэйшы час працы пачнуцца.
На крытычны стан вуліц на працягу апошняга месяца скардзіліся жыхары многіх беларускіх гарадоў.