Сяргею Каваленку пагражае прэвентыўны нагляд
9- 18.04.2013, 12:33
Скарга былога палітвязня на рашэнне Першамайскага суда Віцебска не была задаволеная.
Пра гэта Сяргей Каваленка паведаміў сайту charter97.org.
«Суддзя Віцебскага абласнога суда Ірына Смалякова пакінула рашэнне сваёй калегі з суда Першамайскага раёна Валянціны Кісмерошкінай без зменаў. Я павінен сплаціць 1 мільён штрафу, прысуджанага мне нібыта за дробнае хуліганства. 16 траўня я быў выкліканы ў інспекцыю выканання пакаранняў Першамайскага раёна Віцебска, і мне было вынесенае папярэджанне за пераход дарогі без флікера», - адзначыў былы палітычны вязень.
Актывіст лічыць, што беларускія ўлады мэтанакіравана спрабуюць зрабіць з яго хулігана, каб пазней прымяніць прэвентыўны нагляд.
«Адвакат сказаў, што пасля трох парушэнняў мне могуць прызначыць прэвентыўны нагляд. Хутчэй за ўсё, пасля адмовы ў Абласным судзе, мяне яшчэ раз выклічуць ў інспекцыю і прыпішуць другое парушэнне. Зараз я знаходжуся на прафілактычным уліку пасля вызвалення з калоніі. Ён дазваляе мне вольна перамяшчацца, да мяне не прыходзіць правяраючы інспектар. Але калі будзе прызначаны нагляд, то я павінен буду знаходзіцца дома з 22 вечара да 6-ці раніцы і не змагу выязджаць нават з горада. І ўжо тады пасля трох парушэнняў мяне зноў адправяць у турму», - падкрэсліў актывіст.
Нагадаем, актывіста Кансерватыўна-хрысціянскай партыі БНФ прысудзілі «за дробнае хуліганства» да штрафу памерам у 1 мільён рублёў.
Былы палітвязень быў затрыманы ўвечары 25 сакавіка. Яго абвінавацілі ў тым, што ён пераходзіў вуліцу не па пешаходным пераходзе.
Сяргей Каваленка ў верасні 2012-га быў памілаваны дыктатарам і вызвалены з магілёўскай калоніі. За кратамі ён знаходзіўся са снежня 2011-га года. У лютым мінулага года Каваленка быў асуджаны на 2 гады і 1 месяц калоніі агульнага рэжыму за вывешаны два гады таму ў Віцебску на галоўнай ёлцы горада бел-чырвона-белы сцяг.