Платнікаў таксама чакае размеркаванне
115- 19.04.2013, 17:15
Лукашэнка заявіў, што размяркоўваць трэба ўсіх выпускнікоў медыцынскіх ВНУ, а не толькі бюджэтнікаў.
Для забеспячэння медыцынскай галіны вузкімі спецыялістамі трэба пашыраць мэтавы набор абітурыентаў у медыцынскія ВНУ і кантраляваць працаўладкаванне маладых спецыялістаў, заявіў у пятніцу ў Менску Лукашэнка, піша «Інтэрфакс».
«Не хапае вузкіх спецыялістаў - пашырайце мэтавы набор абітурыентаў у медыцынскія навучальныя ўстановы краіны. Усе медыцынскія ўстановы павінны быць забяспечаныя кадрамі. Па кожнаму непрацаўладкаванаму ў галіне маладому спецыялісту міністр зробіць справаздачу асабіста», - сказаў ён.
Выпускнікі медыцынскіх ВНУ павінны працаваць па спецыяльнасці па-за залежнасці ад таго, за чый кошт ажыццяўлялася навучанне.
«Прыйшоў у ВНУ, вучыўся за кошт дзяржавы ў дзяржаўнай ВНУ, нават калі за асабісты кошт, - ты доктар, ты прыйшоў быць доктарам - едзь і працуй доктарам», - адзначыў Лукашэнка.
«Як бы гэта непапулярна ні гучала, гэта датычыцца ўсіх спецыялістаў і спецыяльнасцяў. Прашу міністраў - прыміце адпаведнае рашэнне. І не стойце ў мяне пад дзвярыма, не чакайце, што гэта прэзідэнт зробіць», - дадаў ён.