Расейскім чыноўнікам забаранілі мець рахункі за мяжой

Дзярждума Расеі прыняла ў другім чытанні законапраект, які забараняе чыноўнікам мець фінансавыя інтарэсы за мяжой.

Да другога чытання ў пакет законапраектаў былі ўнесеныя папраўкі, якія, у прыватнасці, прадугледжваюць увядзенне забароны не толькі на рахункі і каштоўныя паперы, але і на любыя замежныя «фінансавыя інструменты», перадае BBC.

Акрамя таго, як паведаміла напярэдадні галасавання дэпутат ніжняй палаты ад «Адзінай Расеі» Ірына Яравая, забарона будзе распаўсюджвацца не толькі на наяўныя сродкі, але і на захоўванне любых каштоўнасцяў у замежных банках.

«Таксама пашыраецца пералік суб'ектаў, у дачыненні да якіх будуць дзейнічаць гэтыя абмежаванні. Сюды ўвойдуць кіраўнікі буйных муніцыпальных утварэнняў, а таксама кандыдаты на выбарныя пасады», - сказала яна.

Па словах Яравой, перш чым стаць кандыдатам на пасаду члена Савета Федэрацыі, Дзярждумы або іншай вышэйшай службовай асобы, «асоба павінна пацвердзіць безумоўнае выкананне названых забарон».

Дзеці за мяжой

Усяго да другога чытання было ўнесена каля ста паправак, пры гэтым амаль палова з іх была адхіленая.

У прыватнасці, дэпутаты Дзярждумы не падтрымалі папраўку, якая забараняе дзецям высокапастаўленых чыноўнікаў атрымліваць адукацыю за мяжой.

Дэпутат ад КПРФ, намеснік старшыні камітэта па адукацыі Алег Смолін, які выступіў з гэтай ініцыятывай, заявіў, што людзі, якія займаюць дзяржаўныя пасады, павінны вучыць сваіх непаўналетніх дзяцей у Расеі.

Паводле яго слоў, забарона на навучанне дзяцей за мяжой дазволіла бы тым, хто прымае рашэнні, у тым ліку звязаныя з адукацыяй, з аднаго боку, лепш даведацца, што адбываецца ў расейскай сістэме адукацыі, з іншага боку, больш пра яе клапаціцца.

«Пагадзіцеся, што не выдатна, калі ў папярэдняга міністра адукацыі дзеці вучыліся за мяжой, у сучаснага, дарэчы, вучацца ўсё-ткі ў Расейскай Федэрацыі», - сказаў дэпутат.

Тым не менш, кіраўнік камітэта па бяспецы і супрацьдзеянні карупцыі Эрнэст Валееў заявіў, што папраўку вырашана было адхіліць па працэдурных падставах.

Доўгачасовая вайна

Законапраект аб забароне чыноўнікам трымаць грошы ў банках за мяжой быў унесены ў Дзярждуму ў лютым.

У тэксце дакумента гаворыцца, што ён будзе прыняты «ў мэтах забеспячэння нацыянальнай бяспекі Расейскай Федэрацыі, упарадкавання лабісцкай дзейнасці [...] і павышэння эфектыўнасці процідзеяння карупцыі».

Паралельна з гэтым у пачатку красавіка расейскі прэзідэнт падпісаў указы, паводле якіх высокапастаўленыя дзяржслужачыя павінны будуць даваць справаздачу пра буйныя пакупкі, а таксама паказваць у штогадовых дэкларацыях звесткі аб рахунках і нерухомасці за мяжой.

Падпісаныя Пуціным указы таксама прадугледжваюць, што прэзідэнт і кіраўнік яго адміністрацыі змогуць запатрабаваць для праверкі дэкларацыю любога чыноўніка, уключаючы муніцыпальнага.

«Зроблены яшчэ адзін сур'ёзны крок на шляху выкаранення хабараў, адкатаў, казнакрадства, - заяўляў кіраўнік прэзідэнцкай адміністрацыі Сяргей Іваноў. - Барацьба з карупцыяй - гэта не даніна модзе, а не піяр-кампанія, не імкненне адцягнуць увагу грамадства ад іншых праблем. Гэта доўгачасовая вайна».

У той жа час эксперты выказвалі меркаванне, што чакаць маштабнай замены карумпаваных чыноўнікаў у сувязі з апошнімі дзеяннямі Крамля не варта.