Менчукі мітынгуюць супраць ушчыльнення

Жыхары вуліц Цнянская і Беламорская правялі мітынг супраць будаўніцтва дома на месцы спартыўнай пляцоўкі.

Пра гэта charter97.org паведаміў чытач сайта.

У суботу, 27 красавіка, жыхары вуліц правялі вулічны сход.

Яны змагаюцца за захаванне спартыўнай пляцоўкі і зялёнай зоны, на месцы якіх будаўнічая кампанія «Тамбаз» збіраецца будаваць жылы дом.

Мясцовыя жыхары выказалі свой пратэст адміністрацыі раёна, якая праігнаравала меркаванне больш 3000 мясцовых жыхароў, якія выказаліся супраць забудовы спортпляцоўкі. На сходзе быў прыняты зварот у Савет Міністраў, пад якім падпісаліся 52 чалавекі.

У ім людзі запатрабавалі адмяніць праектаванне і будаўніцтва жылога дома з падземнай паркоўкай на скрыжаванні вуліцы Цнянская і завулка Я. Коласа, а таксама абавязалі адміністрацыю Савецкага раёна прывесці ў належны стан і добраўпарадкаваць спартыўную пляцоўку.

Падчас невялікага мітынгу, які праходзіў пад наглядам чатырох супрацоўнікаў міліцыі выступіў грамадскі актывіст Віктар Янчурэвіч.

«Людзі працягваюць змагацца за свае правы, за спартыўную пляцоўку і зялёную зону. Тым больш што Лукашэнка ў сваім пасланні ясна выказаўся з нагоды ўшчыльнення. Мы маем намер і далей дапамагаць мясцовым жыхарам, і цяпер рыхтуем кейсы разам з аб'яднанымі ініцыятыўнымі групамі па праблемах ушчыльнення для адміністрацыі беларускага кіраўніка з патрабаваннем умяшацца ў горадабудаўнічую палітыку, якая праводзіцца Менгарвыканкамам», - заявіў актывіст.

Нагадаем, групы сталічных жыхароў аб'ядналіся для эфектыўнай барацьбы з ушчыльненнем жылой забудовы, абароны зялёных насаджэнняў і экалагічнай абстаноўкі Менска, а гомельскія ўлады спынілі ўшчыльненне пасля пратэстаў мясцовых жыхароў.