Мечыслаў Лысы - марыянетка Лукашэнкі

Пасля прызначэння новага старшыні афіцыйны Саюз палякаў застанецца маргінальнай арганізацыяй, якая не мае рэальнай падтрымкі.

Так журналіст польскай «Gazety Wyborczej» Анджэй Пачобут пракаментаваў сайту charter97.org прызначэнне Мечыслава Лысага (на фота) старшынёй ГА «Саюз палякаў у Беларусі» (СПБ).

«На самой справе Мечыслаў Лысы з'яўляецца чыноўнікам, якога паставілі беларускія ўлады, і яго задача - выконваць указы, якія ён атрымлівае ад адміністрацыі Лукашэнкі, а таксама ад упаўнаважанага па справах рэлігіі і нацыянальных меншасцяў. Гэта не самастойны чалавек, які нешта вырашае. Можна сказаць, што гэта марыянетка Лукашэнкі», - лічыць журналіст.

Ён упэўнены, што афіцыйны саюз палякаў з'яўляецца маргінальнай арганізацыяй, якая не мае абсалютна ніякай падтрымкі палякаў, якія жывуць у Беларусі.

«Калі б улада перастала падтрымліваць пралукашэнкаўскі саюз і не прымушала б лідараў гэтай псеўдаарганізацыі праводзіць з'езды, то ён даўно б знік. Улада хоча мець такое аб'яднанне, каб сказаць, што ў нас усё добра з польскай меншасцю. Гэта нічога больш, чым ідэалагічнае і прапагандысцкае абслугоўванне рэжыму Лукашэнкі. У адносінах паміж непрызнаным саюзам палякаў і афіцыйным нічога не зменіцца. Наш саюз - незалежная структура, якая сама прымае рашэнні, і таму не прызнаная беларускімі ўладамі», - сказаў на заканчэнне Анджэй Пачобут.

Нагадаем, з 2005 года ў краіне існуюць два Саюзы палякаў: афіцыйны, які падтрымлівае палітыку кіраўніцтва Беларусі, і неафіцыйны, які беларускія ўлады не рэгіструюць, але які падтрымлівае Варшава, і актывістам якога з'яўляецца Анджэй Пачобут. Нефармальны Саюз палякаў узначальвае Мечыслаў Яськевіч. Яго сябры падвяргаюцца рэпрэсіям з боку афіцыйных уладаў.