ЗША ўвялі санкцыі супраць міністраў Асада

Новыя санкцыі ўведзеныя ў дачыненні да чатырох міністраў ва ўрадзе Сірыі, а таксама дзяржаўнай авіякампаніі і прыватнай тэлекампаніі.

Пра гэта паведаміла амерыканскае міністэрства фінансаў.

Пад рэжым санкцый трапілі міністр абароны Сірыі Фахд Джасэм аль-Фрэйдж, кіраўнік сірыйскага Міністэрства аховы здароўя Саад Абдэль-Салам ан-Наіфа, а таксама міністры прамысловасці і юстыцыі Аднан Абду ас-Сухні і Нежм Хамад аль-Ахмад.

Яны ўнесеныя ў «чорны спіс» за дачыненне да эскалацыі гвалту ў дачыненні да сірыйскага народа. Акрамя таго, аль-Фрэйджу інкрымінуюцца парушэнні правоў чалавека. У прыватнасці, гаворыцца, што ў яго бытнасць міністрам абароны сірыйскія ўзброеныя сілы беспадстаўна і пастаянна забівалі мірных грамадзян.

Санкцыі таксама ўведзеныя супраць падкантрольнай дзяржаве кампаніі «Сірыйскія авіялініі».

У паведамленні мінфіна падкрэсліваецца, што спецслужба «Аль-Кудс», якая ўваходзіць у склад іранскага Корпуса «вартавых ісламскай рэвалюцыі», выкарыстоўвала «свае самалёты для незаконных паставак грузаў у Сірыю, уключаючы ўзбраенні і боепрыпасы».

Санкцыі таксама ўведзеныя супраць прыватнай тэлекампаніі «Ад-Дунья». Ёй інкрымінуюцца «сувязі з сірыйскім урадам».

Увядзенне рэжыму санкцый азначае замарожванне ўсіх змешчаных пад амерыканскай юрысдыкцыяй актываў, якія могуць належаць фігурантам «чорнага спісу». Грамадзянам ЗША таксама забараняецца ўступаць з імі ў любыя дзелавыя кантакты.