Аляксей Дзікавіцкі: Забарона на спадарожнікавае ТБ - удар па «Белсату»

Абмежаванні на ўсталёўку спадарожнікавага абсталявання служаць прыкладам для аптымістаў, якія кажуць пра дэмакратызацыю беларускага рэжыму.

Так кіраўнік рэдакцыі інфармацыйных праграм тэлеканала «Белсат» Аляксей Дзікавіцкі пракаментаваў сайту charter97.org забарону на спадарожнікавае ТБ для жыхароў шматкватэрных дамоў.

«Падобныя абмежаванні ўжо былі ў 2007 годзе, толькі цяпер яны ўзмацняюцца. Неабходна будзе мець дазвол ад уладаў, ствараць праектную дакументацыю, а потым наймаць фірму, якая ўсталёўвае спадарожнікавыя талеркі. Таму мала хто будзе займацца тым, што прапануе беларуская бюракратычная сістэма. Натуральна, што гэта ўспрымаецца як удар па «Белсату», паколькі мы вяшчаем праз спадарожнік», - сказаў журналіст.

Ён адзначыў, што гэты прыклад можна прывесці некаторым аптымістам, якія кажуць пра тое, што беларускі рэжым стаў на шлях дэмакратызацыі.

«Калі ўсё так добра, то навошта абмяжоўваць доступ да свабоднай інфармацыі? Я расцэньваю гэта адназначна як негатыўны крок. Любое абмежаванне доступу да медыя, няхай гэта будзе фізічнае, тэхнічнае або заканадаўчае, з'яўляецца праявай таго, што называецца адразаннем грамадства ад магчымасці мець вольны доступ да розных крыніц інфармацыі, што само па сабе з'яўляецца парушэннем канстытуцыйных правоў грамадзян», - лічыць Аляксей Дзікавіцкі.

Нагадаем, згодна з Палажэннем аб умовах і парадку ўсталявання на дахах і фасадах шматкватэрных жылых дамоў індывідуальных антэн і іншых канструкцый, зацверджаным пастановай Саўміна №384 ад 16 траўня 2013 года, фізічным і юрыдычным асобам забароненая самастойная ўсталёўка спадарожнікавага абсталявання.