ДАІ зладзіла «зачыстку» ля гандлёвага цэнтра ў Серабранцы
54- 21.05.2013, 20:58
Сем эвакуатараў прыбылі на аўтастаянку да цэнтральнага ўваходу ў гандлёвы цэнтр на праспекце Ракасоўскага.
У рамках гарадской прафілактычнай акцыі «Стоп паркоўка», арганізаванай Дзяржаўтаінспекцыяй супольна з прадстаўнікамі камітэта працы, занятасці і сацыяльнай абароны Менгарвыканкама, на штрафную стаянку эвакуявалі аўтамабілі, прыпаркаваныя з парушэннем правілаў, піша агенцтва «Минск-новости».
«Такія акцыі сталі традыцыйнымі, - адзначыла галоўная спецыялістка управы сацыяльнай падтрымкі насельніцтва камітэта працы, занятасці і сацыяльнай абароны Менгарвыканкама Алена Батура. - У Менску жывуць 2711 інвалідаў-вазочнікаў, з іх блізу 150 маюць пасведчанне кіроўцы. Часта людзям з абмежаванымі магчымасцямі складана знайсці месца на стаянцы каля гандлёвых і іншых аб'ектаў. А ўсё таму, што знарок адведзеныя для інвалідаў месцы займаюць іншыя кіроўцы».
Нагадаем, Дзяржаўтаінспекцыя прапаноўвае ўзмацніць жорсткасць штрафаў для нядбайных аўтааматараў і ўзняць іх у тры разы. Змены могуць закрануць артыкул 18.22 КоАП «Парушэнне правілаў прыпынку і стаянкі транспартнага сродку» бліжэйшым часам. Аб гэтым раней сайту charter97.org паведамілі ў прэс-службе ДАІ Менгарвыканкама.
ДАІ перыядычна ладзіць аперацыі масавай эвакуацыі транспартных сродкаў, якія парушаюць правілы паркоўкі.