Кардынал, які абвясціў пра абранне Папы Францыска, прыедзе ў Беларусь

Беларусь наведае старшыня Папскай рады па міжрэлігійным дыялогу Жан-Луі Таран.

Ён будзе спецыяльным пасланнікам пантыфіка на ўрачыстасцях у гонар 400-годдзя здабыцця абраза Маці Божай Будслаўскай. Плануецца таксама, што Жан-Луі Таран адслужыць імшу ў Архікатэдральным касцёле імя Найсвяцейшай Дзевы Марыі.

Плануецца, што служба ў беларускай сталіцы на чале з легатам Папы пройдзе 7 ліпеня. Гэта стала вядома пасля сустрэчы мітрапаліта Менска-Магілёўскага арцыбіскупа Тадэвуша Кандрусевіча з кардыналам Жан-Луі Таранам, якая прайшла ў Ватыкане, піша catholic.by.

Беларускі біскуп паведаміў легату, што ў Будслаў прыбудзе і рэлікварый з парэшткамі каталіцкай святой з Францыі - Тэрэзы Немаўляці Ісуса. Таксама старшыня Папскай рады пазітыўна ўспрыняў той факт, што на свята запрошаныя прадстаўнікі ўсіх беларускіх канфесій.

Традыцыйныя ўрачыстасці ў Будславе запланаваныя на 5-6 ліпеня. Будслаўскі абраз Божай Маці з'яўляецца адным з найбольш шанаваных абразоў не толькі сярод каталікоў, але і сярод праваслаўных і ўніятаў Беларусі. Ён быў створаны невядомым мастаком у 1649 годзе. Абраз знаходзіцца ў касцёле Ушэсця Маці Божай вёскі Будслаў Мядзельскага раёна. Па некаторых звестках, цудоўная з'яўленне Маці Божай айцам-бернардынцам адбылося яшчэ ў 1588 годзе, хоць больш агульнапрынятай датай ў гісторыкаў лічыцца 1613 год.

Нагадаем, што менавіта ад Жана-Луі Тора, як ад кардынала-пратадыякана, увесь свет пачуў знакамітае «Habemus Papam» 13 сакавіка 2013 года, калі ён абвясціў пра абранне Папы Францыска.