На Бангалор новая схема руху: кіроўцы стаяць у «заторах»

Рух на плошчы Бангалор у Менску арганізаваны па новай схеме.

У тэставым рэжыме на кругавым скрыжаванні запрацавалі святлафоры, перадае БелТА.

Раней тут нанеслі новую разметку. З гэтага часу на плошчы будзе чатыры выдзеленых шэрагі, упершыню ўжываецца разметка 1.7, а таксама стоп-лініі на крузе. Усё гэта, паводле ацэнак экспертаў, не толькі павінна павялічыць прапускную здольнасць, але і зрабіць гэты ўчастак дарогі больш бяспечным.

Як адзначыў старшыня Беларускай асацыяцыі экспертаў і сюрвеераў на транспарце (БАЭС) Юрый Важнік, практыка выявіла некаторыя недахопы ў прапанаванай схеме. Кіроўцы яшчэ не прыстасаваліся да зменаў, і сёння ў ранішні час пік у раёне плошчы рух быў складаны.

«Мы ўлічым заўвагі, узмоцнім тлумачальную працу з кіроўцамі і разлічваем, што новаўвядзенні сябе апраўдаюць. Кардынальна вырашыць праблему магчыма толькі ў выпадку арганізацыі шматузроўневай развязкі. Будаўніцтва трэцяй лініі метро заклікана палепшыць дарожную абстаноўку, але гэта адбудзецца пасля 2014 года», - адзначыў Юрый Важнік.

Асноўная мэта, якую пераследвалі распрацоўшчыкі новай схемы арганізацыі руху, - нічога не будуючы і не перабудоўваючы, шляхам нанясення разметкі, усталёўкі знакаў і святлафораў зрабіць скрыжаванне больш бяспечным (ён у лідарах у сталіцы па колькасці аварый, толькі ў мінулым годзе тут адбылося 350 дарожна- транспартных здарэнняў, шкода страхавых кампаній ад ДТЗ на гэтым участку ацэньвалася ў суму больш як Br1 млрд.). Гэты транспартны вузел ўяўляе сабой скрыжаванне дзвюх магістраляў агульнагарадскога значэння, адзначаецца інтэнсіўны левапаваротны рух (па ўсіх чатырох напрамках), у тым ліку з удзелам тралейбусаў, няма падземнага пешаходнага пераходу пры высокім пасажырапатоку.

Становішча ў раёне плошчы Бангалор не раз разглядалася спецыялістамі, прапаноўваліся розныя варыянты паўплываць на сітуацыю. У іх ліку «разрэз» кальца, як гэта зроблена на скрыжаваннях Прытыцкага - Пушкіна, Дзяржынскага - Цэткін, Партызанскі - Ванеева. На думку Юрыя Важніка, дадзенае рашэнне не прынесла б станоўчых вынікаў, улічваючы асаблівасці скрыжавання. Да ліку пераваг ужытага ў цяперашні час падыходу адносіца магчымасць размеркавання нагрузкі на ўсе палосы руху, для павароту налева вызначана 15 «вакантных» месцаў у кожным кірунку і інш

Разам з тым кіроўцы пакуль не бачаць паляпшэнняў дарожнай абстаноўкі ў раёне плошчы Бангалор, ёсць нараканні і ў транспартных арганiзацый у частцы руху тралейбусаў. На думку Юрыя Важніка, патрабуецца час для таго, каб новая схема прыжылася. Сярод прапаноў - перагледзець працу грамадскага транспарту.