«Гавары праўду» адмовілі ў рэгістрацыі
18- 17.06.2013, 13:53
- 16,643
Міністэрства юстыцыі адмовілася зарэгістраваць рэспубліканскае даследча-асветніцкае грамадскае аб'яднанне «Гавары праўду».
Устаноўчы сход быў праведзены 13 красавіка, і 8 траўня падалі дакументы на рэгістрацыю грамадскага аб'яднання. Адказ з міністэрства павінен быў прыйсці да 8 чэрвеня, але ліст з Мінюста датаваны 12 чэрвеня, патлумачыў «Радыё Свабода» актывіст «Гавары праўду» Сяргей Вазняк:
«Гэта значыць, сам Мінюст парушыў тэрміны, якія законам даюцца на рэгістрацыю або матываваную адмову ў рэгістрацыі. То бок, у нас рэгістрацыяй займаецца дзяржаўны орган, які сам парушае заканадаўства».
Са словах Вазняка, у лісце прыводзяцца дзве прычыны адмовы ў рэгістрацыі.
Чыноўнікі палічылі, што тэрмін дзеяння гарантыйнага ліста (а ён быў да 31 траўня) на юрыдычны адрас скончыўся.
«Але гэта не з'яўляецца парушэннем, бо на момант падачы ў нас быў гарантыйны ліст. І яны маглі папрасіць падаўжэння дзеяння гэтага ліста. То бок, гэта не такое парушэнне, якое немагчыма ліквідаваць. А ў законе гаворыцца, што адмаўляецца ў рэгістрацыі толькі тады, калі парушэнні нельга ліквідаваць», - растлумачыў Вазняк.
Другую прычыну чыноўнікі знайшлі ў тым, што нібыта не вызначаны колькасны склад управы.
«Ён у нас вызначаны: 5 чалавек, і ёсць спіс прозвішчаў. Гэта ўжо проста лухта, якую немагчыма каментаваць», - сказаў Вазняк.
Сяргей Вазняк паведаміў, што пастанова Мінюста будзе абскарджаная ў Вярхоўным судзе, а потым зноў будуць пададзеныя дакументы на рэгістрацыю ў Мінюст.
Актывіст таксама паведаміў, што гэта была ўжо трэцяя спроба зарэгістравацца.
Фота: zapraudu.info