Расея адправіць Асаду баявыя самалёты Як-130
41- 20.06.2013, 13:23
- 16,502
Вучэбна-баявыя самалёты Як-130, замоўленыя раней Сірыяй, гатовыя да адпраўкі заказчыку.
Пра гэта са спасылкай на крыніцу ў расейскай дэлегацыі на авіясалоне «Ле-Буржэ», які адкрыўся ў Парыжы, паведамляе РІА «Новости».
Самалёты ўжо пабудаваныя прадпрыемствам «Іркут» і стаяць на пляцоўцы завода. Па словах суразмоўцы агенцтва, пакуль што вырабленыя толькі планеры, у якія пры атрыманні станоўчага «палітычнага рашэння» ўсталююць рухавікі і авіёніку, пасля чаго адправяць у Сірыю. Кантракт на пастаўку Як-130 быў падпісаны яшчэ ў снежні 2011 года, таму 18 чэрвеня на прэс-канферэнцыі па выніках саміту G8 прэзідэнт Расеі Уладзімір Пуцін заявіў, што пастаўкі зброі ў Дамаск ажыццяўляюцца на законнай падставе.
Аванс за першыя шэсць самалётаў у памеры каля ста мільёнаў даляраў быў пералічаны ў чэрвені, піша «Коммерсант».
Як-130 дазваляе навучаць лётчыкаў пілатаванню знішчальнікаў пятага пакалення і пакалення «4++». Кошт аднаго самалёта пры гэтым амаль на парадак (15 мільёнаў даляраў супраць 100-150) менш кошту баявых знішчальнікаў. Усталяваная на борце лічбавая сістэма кіравання дазваляе імітаваць паводзіны іншых самалётаў, у той час як «шкляная кабіна» (замест электрамеханічных прыбораў выкарыстаныя шматфункцыянальныя дысплеі) дае магчымасць мадэляваць нават іншыя кабіны, піша Lenta.ru.
Па сваіх тэхнічных характарыстыках, уключаючы хуткасць, далёкасць і практычны столь, Як-130 прыкметна саступае баявым самалётам, хоць і існуе практычная магчымасць усталёўкі на яго 3000 кілаграм узбраення на шасці кропках падвескі.
Нагадаем, у траўні стала вядома пра рашэнне Масквы паставіць Дамаску комплексы С-300. МЗС Расеі заявіў, што яны будуць прададзеныя рэжыму Асада для абароны ад інтэрвенцыі.
Канфлікт паміж прыхільнікамі і праціўнікамі Асада, перарос у грамадзянскую вайну, якая працягваецца ў Сірыі з сакавіка 2011 года. Па дадзеных ААН, з пачатку ваенных дзеянняў у Сірыі загінулі не менш за 90 тысяч чалавек. Велікабрытанія і ЗША заявілі пра магчымасць паставак узбраення апазіцыі пасля інфармацыі аб ужыванні войскамі Асада хімічнай зброі.
