Velcom павышае кошты

З 27 ліпеня званкі падаражэюць на 1,5-7 адсоткаў.

Рост коштаў закране званкі і абаненцкую плату на галасавых тарыфных планах для фізічных асоб, аднаразовыя ўнёскі і тарыфы на спецыяльныя і дадатковыя паслугі, перадае БелТА.

Павышэнне абаненцкай платы для большасці тарыфных планаў складзе ад 1,5% да 7%. Званкі ўнутры краіны падаражэюць на 4-7%. У кампаніі падлічылі, што сярэдні кошт для абанента пацяжэе на 2,7%.

Змены закрануць тарыфныя планы лінейкі «Бізнэс». Пры гэтым павышэнне абаненцкай платы будзе суправаджацца ростам аб'ёмаў уключаных хвілін і інтэрнэт-трафіку.

Без зменаў застануцца памеры штомесячных плацяжоў за абсталяванне, набытае ў растэрміноўку па раней заключаных дамовах, тарыфы на выходныя міжнародныя званкі і відэазванкі. Акрамя таго, мабільны аператар захавае дзеючыя кошты на мабільны Інтэрнэт (абаненцкую плату і кошт трафіку), SMS і MMS, а таксама званкі ў роўмінгу. Таксама не падаражэюць паслугі для карыстальнікаў сацыяльнага тарыфнага плану.

«Для пераважнай большасці абанентаў сярэдні кошт вырасце толькі на 2,7%. Гэта звязана з тым, што без мадыфікацый застануцца такія папулярныя паслугі, як мабільны Інтэрнэт, SMS, MMS і званкі ў роўмінгу», - адзначыў генеральны дырэктар ЗП «Вэлком» Гельмут Дуз.