Мытнікі вымагаюць у парашутыста $1500 за пасылку
46- 10.07.2013, 9:15
- 36,426
Чыноўнікі патрабуюць размытніць прыборы, якія былі часова вывезеныя з Беларусі для рамонту.
Парашутыст-аматар адправіў іх пасылкай свайму сябру, таму што выправіць непаладкі ў нашай краіне было немагчыма. Мытня ўжо тры месяцы адмаўляецца вяртаць пасылку, настойваючы на выплаце 1500 даляраў.
Пра гэта распавёў у сваім лісце чытач charter97.org.
«Я парашутыст-аматар. Займаюся парашутным спортам і збіраюся адкрыць невялікі бізнес. Як будзе зразумела пазней, наўрад ці гэты бізнес будзе размяшчацца на тэрыторыі Рэспублікі Беларусь. Як правіла, ва ўсіх спартсменаў рана ці позна ўзнікае неабходнасць рамонту і абслугоўвання свайго рыштунку, і ў мяне таксама. Я сабраў сабе тры парашутныя сістэмы, скачу рэгулярна на іх. Кожная абсталяваная невялікім прыборам, які страхуе жыццё спартсмена ў выпадку ўзнікнення непрадбачаных абставінаў: страта свядомасці ў паветры, сутыкненні, адмовы. Гэтыя прыборы патрабуюць рэгламенту Cypres2, раз у 4 гады, два разы на працягу ўсяго тэрміну службы - 12,5 гадоў», - адзначае чытач.
Ён падкрэслівае, што такія прыборы вырабляюцца толькі ў двух месцах у свеце: у ЗША і Германіі, і магчымасцяў рамонту не так і шмат.
«На шчасце, у мяне ёсць калега ў ЗША, знакаміты ў нашых колах Майк Грувел (Mike Gruwell), і я такі рэгламент раблю праз яго. Беларусь далёка ад ЗША - вось я і вырашыў адправіць прыборы па пошце, каб зэканоміць ў часе і кошту дастаўкі. Як і водзіцца, азнаёміўся з мытным кодэксам Мытнага саюза, запоўніў запаветныя бланкі CN-23 і EMS, зрабіў фатаграфію, уклаў у суправаджальную дакументацыю, адправіў. Прыемна, што ксеракопіі CN-23 і EMS бланка, а таксама фатаграфіі прыбораў вярнуліся да мяне з пячаткай 136 «Выпуск дазволены». Чакаю», - піша чытач.
Ён дадае, што пасылка, у рэшце рэшт, прыйшла, а разам з ёй ліст аб неабходнасці растаможкі ў Менскай рэгіянальнай мытні.
«На складзе часовага захоўвання на 5 паверсе мяне сустракае непрыемнага выгляду мытніца Ала Вітальеўна Стома і крычыць на мяне, што прыборы трэба размытніць, і заплаціць за іх за 1500 даляраў. Паказваю CN-23 з ідэнтыфікацыйнымі нумарамі, што тавар быў часова вывезены, прычына - «рамонт з вяртаннем», але для яе гэта не дакумент. У гэты ж дзень я запісаўся на прыём да начальніка менскай рэгіянальнай мытні. Мяне прынялі. Тыя ж словы ў спакойнай форме. На пытанне, дзе напісана ў мытным кодэксе МС аб «часовым вывазе толькі для юрыдычных асоб» або «для фізічных асоб на час знаходжання за мяжой», мне адказаць не змаглі», - піша ён.
Аўтар ліста звярнуўся ў Менскую рэгіянальную мытню.
«Шаноўная» мытня цягнула месяц і даслала адказ: «Мы адправілі запыт у дзяржаўны мытны камітэт, чакайце». Атрымліваецца, што Закон аб зваротах грамадзян для мытні не пісаны, так як усе звароты разглядаюцца ў тэрмін да месяца, калі не адпраўляецца запыт у замежную дзяржаву або не выконваюцца працы-паслугі. Я напісаў скаргу на бяздзейнасць Менскай рэгіянальнай мытні ў пракуратуру Менскага раёна і ў Дзяржаўны мытны камітэт. Адказу ад мытнага камітэта няма да гэтага часу. Пракуратура Менскага раёна пераадрасавала запыт у Беларускую транспартную пракуратуру, а тая не знайшла прычын пакараць супрацоўнікаў Менскай рэгіянальнай мытні згодна з арт. 9.13 КаАП РБ, таму што згодна з арт. 33 мытнага кодэкса Рэспублікі Беларусь, дзеянні або бяздзейнасці супрацоўнікаў мытні абскарджваюцца ў судзе. Такім чынам, амаль тры месяцы я не магу атрымаць сваю пасылку, у якой знаходзяцца прыборы, тэрмін службы якіх заканчваецца з кожным днём», - абураецца чытач.