Лекары і будаўнікі масава пакідаюць краіну

Попыт на лекараў у 100 разоў перавышае прапанову.

На рынку працы Беларусі адчуваецца востры дэфіцыт медработнікаў і будаўнікоў. Беларускія спецыялісты масава з'язджаюць за мяжу.

Аб гэтым сведчыць аналіз балансу вакансій найбольш масавых прафесій на 1 чэрвеня гэтага года, паведамляюць ва ўпраўленні палітыкі занятасці Міністэрства працы і сацыяльнай абароны.

Так, у гарадскіх службах занятасці зарэгістравана 10 беспрацоўных лекараў, а патрэбнасць у іх (зыходзячы з колькасці вакансій, заяўленых наймальнікамі) у 100 з лішкам разоў больш - 1024. Попыт наймальнікаў на медыцынскіх сясцёр у гарадах амаль у 50 разоў перавышае прапанову: на 1414 вакансій умоўна прэтэндуюць 30 беспрацоўных з адпаведнай сярэдняй спецыяльнай адукацыяй. Для 10 беспрацоўных фельчараў таксама маецца шырокі выбар рабочага месца ў гарадах краіны - 140. Дарэчы, год таму вакансій работнікаў аховы здароўя было значна менш.

Зрэшты, лекары і медсёстры карыстаюцца попытам не толькі ў гарадах, але і ў вёсцы. Так, у сельскай мясцовасці не хапае 54 лекараў і 63 медыцынскіх сясцёр, а дыплом аб заканчэнні медыцынскай ВНУ і ССНУ маюць 1 і 10 сельскіх беспрацоўных адпаведна піша БелТА.

У параўнанні з папярэднімі гадамі кардынальна змянілася сітуацыя з пошукам працоўнага месца для бухгалтараў, эканамістаў і юрыстаў. Калі раней колькасць беспрацоўных з такімі дыпломамі значна перавышала колькасць прапанаваных працоўных месцаў, то паводле дадзеных на 1 чэрвеня попыт значна перавысіў прапанову.

Што тычыцца іншых спецыялістаў і служачых, то ў гарадах назіраецца дэфіцыт праграмістаў (16 чалавек на ўліку па беспрацоўі, 167 вакансій), інжынераў (135 беспрацоўных, 470 вакансій), майстроў (адпаведна 102 і 241), прарабаў (17 і 138), а таксама выхавальнікаў (63 і 291). У вёсцы таксама адзначаецца павышаны попыт на інжынераў (на 15 беспрацоўных - 105 вакансій). Але асабліва неабходныя для сельскіх наймальнікаў ветэрынары (на 4 беспрацоўных - 284 вакансіі), заатэхнікі (на 3 беспрацоўных - 276 прапаноў працоўнага месца), аграномы (13 і 129).

Тэрытарыяльны дысбаланс існуе не толькі ў дачыненні да спецыялістаў і служачых, але і ў адносінах да рабочых, адзначылі ў міністэрстве. Так, у гарадах у фаворы ў наймальнікаў муляры (на 317 жадаючых працаваць - 2310 прапаноў наймальнікаў), бетоншчыкі (на 157 беспрацоўных - 990 вакансій), маляры (230 і 1040 адпаведна), тынкоўшчыкі (287 і 1364) і іншыя ўладальнікі будаўнічых спецыяльнасцяў. Па-ранейшаму запатрабаваныя слесары, вадзіцелі аўтамабіляў, электраманцёры, электрагазазваршчыкі, прадаўцы, швачкі, кандуктары і г.д. А на вёсцы сярод самых дэфіцытных рабочых прафесій - трактарысты-машыністы (40 беспрацоўных пры 662 вакансіях), трактарысты (81 і 394 адпаведна), вадзіцелі аўтамабіля (136 і 541), аператары машыннага даення (88 і 645). Варта адзначыць, што сітуацыя на сяле за год прыкметна змянілася ў лепшы бок - і беспрацоўных, і вакансій стала значна менш практычна па ўсім спектры рабочых прафесій.

Калі адток кадраў працягнецца, то праз пару гадоў гэта можа стаць для Беларусі катастрофай, заявіў у інтэрв'ю сайту charter97.org намеснік старшыні Беларускага кангрэсу дэмакратычных прафсаюзаў (БКДП) Сяргей Антусевіч.

«Узровень заробкаў у Расеі нашмат вышэй. Добра, што ўлады хоць цяпер заўважылі гэтую праблему. Калі так і працягнецца, то праз пару гадоў гэта можа стаць для Беларусі проста катастрофай. Нават да дэвальвацыі ў 2011 годзе ў многіх паліклініках бракавала пэўных спецыялістаў. Зараз людзі шукаюць лепшае жыццё і з'язджаюць за мяжу, у першую чаргу ў Расею, бо няма мяжы, няма моўнага бар'ера, а нашыя дыпломы прызнаюцца», - адзначыў прафсаюзны лідар.

Нагадаем, паводле розных ацэнак, за межамі Беларусі працуе каля мільёна грамадзян нашай краіны. Асноўная частка працоўных мігрантаў прыпадае на моладзь ва ўзросце ад 25 да 35 гадоў.