«Барацьба» з АЧС: пагрозы і запалохванні вяскоўцаў

Супраць вяскоўцаў, якія адмовяцца забіваць сваіх свіней, «будуць прынятыя меры».

Незалежны журналіст Зміцер Лупач не змог трапіць на сход жыхароў вёскі Дзеркаўшчына, дзе 28 ліпеня абмяркоўвалася забарона вырошчваць свіней у 5-кіламетровай зоне ад свінакомплексу «Маліноўшчына». Засцярога выкліканая небяспекай распаўсюджвання афрыканскай чумы свіней, а якую пагрозу ўяўляў сабой журналіст - невядома, піша ПЦ «Вясна».

Зміцер Лупач распавёў, што міжволі мог стаць прычынай для звальнення ўчастковага міліцыянта:

«Толькі мяне ўбачыўшы, старшыня нашага Глыбоцкага райвыканкама Алег Морхат звярнуўся да намесніка начальніка міліцыі Глыбоцкага раёна Віктара Адамовіча. Маўляў, хто Лупача прапусціў і дзе ўчастковы. Сёння ж звольніць участковага з працы. Бо раптам у мяне з сабой ёсць аўтамат, і я ўсіх тут перастраляю».

Адкуль такія падазрэнні ў кіраўніка раёна, журналіст не ведае. На сход Змітра Лупача не пусцілі, таму што ён - не жыхар Дзеркаўшчыны. Зрэшты, міліцыяй запалохвалі і тых, хто быў на сходзе: прагучаў загад прыбраць з прыватных гаспадарак усіх свіней. А адносна тых, хто гэтага не зробіць, «будуць прынятыя меры, будзе падключаны РАУС», - распавёў спадар Лупач.

Паўплываць на людзей праз незалежную прэсу прысутныя на сходзе кіраўнік раёна, прадстаўнікі раённай ветслужбы, аховы прыроды, кіраўніцтва сельсавета і мясцовага сельгаспрадпрыемства не прызначылі. А мясцовыя жыхары, у сваю чаргу, казалі пра тое, што запалохванне міліцыяй і «іншымі мерамі» - гэта парушэнне іх правоў. Бо замест сур'ёзных аргументаў яны чулі толькі пагрозы. Аднак ніякага афіцыйнага загаду, каб знішчыць усіх свіней на вёсцы і больш не заводзіць, ім не паказалі.