Гістарычны палёт: самалёт на сонечных батарэях перасёк ЗША
22- 7.07.2013, 11:22
- 20,971
Самалёт Solar Impulse паспяхова сеў у суботу ўвечары ў нью-ёркскім аэрапорце імя Джона Кэнэдзі.
Такім чынам, быў завершаны гістарычны пералёт апарата на сонечных батарэях праз кантынентальную частку ЗША, піша NEWSru.com.
Экспедыцыя, агульная працягласць маршруту якой склала каля 5 тысяч кіламетраў, стартавала 3 мая на Заходнім узбярэжжы ЗША ў штаце Каліфорнія. Цяперашні – пяты і апошні этап місіі – пачаўся ў суботу раніцай у Вашынгтоне. На паўдарозе на левым крыле Solar Impulse сапсавалася ашалёўка, у выніку чаго пілоту – швейцарцу Андрэ Боршбергу – прыйшлося зрэзаць дыстанцыю, каб хутчэй дабрацца да пункта прызначэння, перадае ИТАР-ТАСС.
Самалёт дакрануўся узлётна-пасадачнай паласы каля 23:09 па мясцовым часе (06:09 па Мінску) – на тры гадзіны раней запланаванага. Пры пасадцы Андрэ не карыстаўся аэрадынамічным тормазам, каб пазбегнуць ўзнікнення ўнутры крыла пагібельнай вібрацыі. Для гэтага яму давялося спланіраваць на вельмі нізкай вышыні і хуткасці.
Solar Impulse, сканструяваны ў Швейцарыі, прыводзіцца ў рух чатырма маторамі магутнасцю 10 конскіх сіл кожны. Яны сілкуюцца ад 400-кілаграмовага літыевага акумулятара, які зараджаецца з дапамогай сонечнай энергіі, якая збіраецца 2 тыс фотаэлементамі, што размешчаныя на крыле. Пры гэтым размах крыла манаплана супастаўляльны з размахам у аэробуса А340-600 - 63,4 м, у той час як яго вага складае 1,6 тоны - амаль у 230 разоў менш, чым у згаданага авіялайнера. Дзякуючы невялікай масе Solar Impulse здольны развіваць крэйсерскую хуткасць у 70 км/г і падымацца на вышыню 9,2 тыс м.
За навінамі экспедыцыі можна было сачыць на яе афіцыйным сайце. Там жа была арганізаваная прамая трансляцыя з відэакамер, усталяваных на борце самалёта, у цэнтры кіравання палётам і ў пункце прызначэння. Акрамя таго, на сайце фіксаваліся асноўныя паказчыкі – хуткасць палёту, яго вышыня і курс, а таксама ўзровень зарада акумулятара.