Алігарх Машэнскі захапіў возера пад Берасцем

Берасцейцы не могуць патрапіць на пляжы на Белым возеры праз тое, што лукашэнкаўскі алігарх будуе на яго беразе базу адпачынку.

Нягледзячы на тое, што сам вадаём, які знаходзіцца недалёка ад абласнога цэнтра, не з'яўляецца прыватнай тэрыторыяй, ахоўнікі адмаўляюцца прапускаць людзей да яго.

Ліст абураных чытачоў, якія захацелі агучыць гэтую праблему, публікуе выданне “Турызм і адпачынак”.

”Пра тое, што частка тэрыторыі абгароджана высокім плотам, за якім ужо практычна скончана будаўніцтва базы адпачынку СП “Санта-Імпэкс-Брэст”, было вядома даўно. Ужо год таму там разгарнулася грандыёзнае будаўніцтва. Прычым абгароджаны ўчастак даходзіў аж да самай вады так, як там павінны былі праводзіцца працы па ачыстцы возера ўключна. Але якое ж было здзіўленне, калі, прыехаўшы цяпер, у разгар купальнага сезону, мы выявілі цалкам абгароджаную тэрыторыю вакол турыстычнага комплексу “Белае Возера”. На пытанне да ахоўнікам: “Ці можна прайсці да возера?” Пачулі “Не, гэта прыватная тэрыторыя. З усімі пытаннямі – да дырэктара” – ахоўніка відавочна перапаўняла пыхлівасць і пачуццё гонару ад даручанага яму задання”, – гаворыцца ў лісце.

Берасцейцы патэлефанавалі ў аддзел спорту і турызму гарвыканкама. Там сказалі, што тэрыторыя базы адпачынку – прыватная, але само возера – не. І свабодны доступ да пляжу павінен быць ва ўсіх.

Дырэктар турыстычнага комплексу “Белае Возера” растлумачыў, што агароджа тэрыторыі “звязана з прадпісаннямі санстанцыі і міліцыі”. Паводле яго слоў, пляж разлічаны на 100 месцаў, а прыязджаюць больш за 400 чалавек.

Аднак, сведкі, якім удалося пракрасціся на тэрыторыю пляжу, паведамляюць, што на ім было бачна ўсяго толькі некалькі адпачывальнікаў.

Будаўніцтва базы адпачынку на Белым возеры вядзе фірма “Санта-Імпэкс”, якая належыць лукашэнкаўскаму алігарху Аляксандру Машэнскаму. У мінулым годзе яму прадракалі, што можа апынуцца ў “чорны спісе” ЕЗ. Брусэльскае выданне EUobserver называла берасцейскага бізнесмена сярод тых, каго могуць неўзабаве закрануць санкцыі, паколькі Машэнскі “адыграў важную ролю ў кампаніі Лукашэнкі на прэзідэнцкіх выбарах 2010 года і стаў трэцім па ўплывовасці алігархам пасля Уладзіміра Пефціева і Юрыя Чыжа”.