Менскі рэпетытар: У верасні ў Беларусі пачнецца масавы зыход настаўнікаў са школ

У выніку павышэння зарплаты ў сувязі з павышэннем нагрузкі многія настаўнікі адчуюць сябе падманутымі.

Так лічыць рэпетытар па матэматыцы і фізіцы Яўген Лівянт, пішуць «Белорусские новости».

Ён не выключае «масавы зыход» гарадскіх настаўнікаў са школ ужо ў верасні, пасля атрымання першай у гэтым навучальным годзе зарплаты (на вёсцы гэтага не здарыцца, так як там папросту няма іншай працы). «Хачу звярнуць увагу на тое, - кажа Лівянт, - што пры павелічэнні настаўніцкай стаўкі з 18 гадзін да 20 гадзін зарплата змяншаецца на 11%. А значыць, павелічэнне зарплаты складзе не 25%, а прыблізна 13%, што супастаўна з узроўнем гадавой інфляцыі ў краіне. Таксама ўзнікае пытанне - ці падымуць настаўнікам зарплату двойчы - у сувязі з павелічэннем нагрузкі і ў сувязі з павышэннем стаўкі першага разраду з 1 верасня? Або рост зарплаты на 13% як раз з гэтым і звязаны? Я быў бы рады памыліцца, але мяркую, што зарплата настаўнікаў практычна не зменіцца».

Акрамя таго, Лівянт адзначыў, што ў пастанове Саўміна нічога не гаворыцца пра выхавальнікаў дзіцячых садкоў, зарплата якіх недацягвае да настаўніцкай і з'яўляецца вельмі нізкай у параўнанні з важнай сацыяльнай і педагагічнай роляй, якую выхавальнікі выконваюць. Як вынік, у большасці дзіцячых садкоў Менска выхавальнікаў хранічна бракуе.

Не толькі нізкая зарплата, але і дрэнная арганізацыя працы ў школе, бюракратыя, непавага да асобы настаўніка, з'яўляюцца фактарамі, якія прывялі да таго, што ў беларускім грамадстве «сфармавалася адрыньванне настаўніцкай прафесіі», - адзначыў Лівянт. Ён падкрэсліў, што ўступная кампанія гэтага года, калі на многія педагагічныя спецыяльнасці быў недабор нават на бюджэт, гэта наглядна прадэманстравала.

«Год таму, - адзначыў Лівянт, - у сувязі з новымі правіламі прыёму ў ВНУ я апублікаваў артыкул з прадказаннем недабору на бюджэтныя месцы на многія педагагічныя і сельскагаспадарчыя спецыяльнасці ВНУ. На жаль, мой прагноз аказаўся дакладным».

У дзяржавы зараз няма фінансавых магчымасцяў прывязаць настаўніка да школы з дапамогай зарплаты, лічыць Лівянт. Каб было па-іншаму, трэба кардынальна скараціць бюракратычную нагрузку на настаўніка, гэта значыць «заканадаўча вызначыць, што настаўніцкая пісаніна не павінна выходзіць за рамкі класнага журнала». Зараз «велізарная колькасць нікому не патрэбных дакументаў і псеўдавыхаваўчых мерапрыемстваў паралізуе працу школы». Час ужо зразумець, што «бюракратыя ў школе супярэчыць настаўніцкай сутнасці і задачам настаўніка», адзначае ён. Лівянт лічыць, што так можна зэканоміць дастаткова шмат грошай.

«Мяркуйце самі, - адзначыў ён, - раней у школе з усімі паперамі спраўлялася адна сакратарка з друкавальнай машынкай, а цяпер у кожнай школе цэлае машбюро з сучаснай аргтэхнікай. Раней адзін бухгалтар з лічыльнікамі абслугоўваў каля дзесяці навучальных устаноў, а цяпер у кожнай школе па 1-2 бухгалтара з адмысловымі бухгалтарскімі праграмамі. Нескладана палічыць магчымую эканомію ў маштабах краіны».

У цэлым Лівянт падкрэслівае: важна, каб людзі, якія прымаюць рашэнні ў сістэме адукацыі, прызналі, што ў школьнай адукацыі назапасілася вялікая колькасць узаемазвязаных праблем. Немагчыма вырашаць іх па адной. «Нават, калі я не маю рацыю ў сваіх здагадках, і настаўніцкая зарплата павялічыцца на 25%, ніякіх істотных паляпшэнняў у сістэме сярэдняй адукацыі не адбудзецца. Трэба гаварыць пра сістэмны крызіс, а потым прымаць комплекс мер па мадэрнізацыі школьнай адукацыі», - сказаў эксперт.

Frau Novitzki