The Pirate Bay прадставіў браўзэр для абыходу інтэрнэт-цэнзуры

Торэнт-партал The Pirate Bay прадставіў «пірацкі» браўзэр, прызначаны для абыходу інтэрнэт-цэнзуры і іншых абмежаванняў у Сетцы.

Пра дастасаванне паведамляецца ў блогу The Pirate Bay.

PirateBrowser уяўляе сабой зборку з кліента для доступу да ананімнай сеткі Tor і «партатыўнай» версіі браўзэра Firefox з шэрагам спецыяльных налад. Дадатак даступны толькі для аперацыйнай сістэмы Windows, піша Lenta.ru.

У апісанні PirateBrowser гаворыцца, што ён дазваляе абыходзіць інтэрнэт-цэнзуру ў Іране, Паўночнай Карэі, Велікабрытаніі, Бельгіі і іншых краінах. Пры гэтым распрацоўшчыкі падкрэсліваюць, што іх дастасаванне прызначанае толькі для абыходу абмежаванняў і, нягледзячы на выкарыстанне Tor, не забяспечвае ананімнасці ў Сетцы.

З дапамогай «пірацкага» браўзэра, гаворыцца ў блогу The Pirate Bay, можна будзе адкрываць торэнт-партал там, дзе заблакаваны прамы доступ да яго. Анонс дастасавання быў прымеркаваны да 10-годдзя рэсурсу.

Доступ да The Pirate Bay заблакаваны ў шэрагу краін, уключаючы Бельгію, Нідэрланды і Індыю. Звязана гэта з абвінавачваннямі ў тым, што рэсурс распаўсюджвае пірацкі кантэнт - фільмы, музыку і дастасаванні.

1 жніўня ў Расеі ўступіў у сілу антыпірацкі закон, у адпаведнасці з якім мясцовыя інтэрнэт-карыстальнікі таксама могуць застацца без доступу да торэнт-парталу. Гэта адбудзецца ў тым выпадку, калі праваўладальнік, які выявіў нелегальнае распаўсюджванне яго фільма на сайце, звернецца ў суд. Па законе, калі ўладальнікі сайта не выдаляюць спрэчны кантэнт, доступ да рэсурсу блакуецца на ўзроўні правайдэраў. Пры гэтым сузаснавальнік The Pirate Bay Петер Сундэ (Peter Sunde) ў інтэрв'ю «Ленте.ру» падкрэсліў, што адміністрацыя рэсурсу «ніколі не цэнзуравала» яго змесціва.

The Pirate Bay - найбуйнейшы файлаабменны рэсурс у свеце. Партал уваходзіць у топ-100 рэйтынгу самых папулярных сайтаў па дадзеных Alexa. На сайце зарэгістравана 4,6 мільёна раздач.