Арыштаваны топ-менеджэр Барысаўскага мясакамбіната

Крымінальная справа распачатая ў дачыненні да былога намесніка генеральнага дырэктара па камерцыйных пытаннях ААТ «Барысаўскі мясакамбінат».

Упраўленнем па барацьбе з карупцыяй і арганізаванай злачыннасцю Генеральнай пракуратуры ва ўзаемадзеянні з УРТЭП УУС Менаблвыканкама праведзеная праверка, па выніках якой у дачыненні да былога намесніка генеральнага дырэктара па камерцыйных пытаннях ААТ «Барысаўскі мясакамбінат» распачатая крымінальная справа па прыкметах здзяйснення злачынства, прадугледжанага ч.3 арт. 424 КК (злоўжыванне ўладай або службовымі паўнамоцтвамі, што пацягнула цяжкія наступствы), паведамляе прэс-служба Генпракуратуры.

З матэрыялаў праверкі угледжваецца, што падазраваны ў парушэнне патрабаванняў Палажэння аб закупцы тавараў, работ і паслуг з карыслівай і іншай асабістай зацікаўленасці аддаваў указанні падначаленым супрацоўнікам ажыццяўляць за кошт сродкаў ААТ «Барысаўскі мясакамбінат» закупку гафратары ў пасрэдніцкай структуры, заснавальнікам якой ён раней з'яўляўся, па завышаных коштах без правядзення працэдуры ацэнкі і выбару пастаўшчыка, адкрытага конкурсу. Яго дзеяннямі прадпрыемству нанесены ўрон на суму звыш 691 млн. рублёў.

Для арганізацыі папярэдняга следства крымінальная справа накіраваная ва ўпраўленне Следчага камітэта Рэспублікі Беларусь па Менскай вобласці.