Віцэ-прэзідэнтам Ірана ўпершыню стала жанчына
24- 12.08.2013, 17:30
- 9,731
Эльхам Амінзадэ прызначаная віцэ-прэзідэнтам па прававых пытаннях.
Адпаведны ўказ падпісаў новы прэзідэнт краіны Хасан Раўхані, паведамляе Fars news.
Эльхам Амінзадэ стала першай у гісторыі Ірана жанчынай, якая заняла такую высокую пасаду ў кіраўніцтве Ісламскай Рэспублікі.
Свой выбар Хасан Раўхані патлумачыў тым, што Эльхам Амінзадэ валодае неабходнымі навуковымі ведамі, судовай кваліфікацыяй і заканадаўчым вопытам, а таксама высокімі маральнымі якасцямі, піша NEWSru.com.
Эльхам Амінзадэ да новага прызначэння была членам парламенцкага камітэта па нацыянальнай бяспецы і знешняй палітыцы, а таксама выкладала на факультэце права Тэгеранскага ўніверсітэта.
Таксама кіраўнік выканаўчай улады прызначыў віцэ-прэзідэнтам па планаванні і стратэгічным наглядзе Мухамеда Багіра Набахта - генеральнага сакратара Партыі ўмеранасці і развіцця Ірана і афіцыйнага прадстаўніка прэзідэнцкай кампаніі самога Раўхані.
Да гэтага Раўхані прызначыў Эшага Джахангіры першым віцэ-прэзідэнтам, Мартэзу Банка - віцэ-прэзідэнтам па выканаўчых пытаннях, а Махамада Нехавендыяна - кіраўніком прэзідэнцкай адміністрацыі.