Заробак падвысяць толькі настаўнікам, якія «напружваюцца»
72- 15.08.2013, 13:43
- 30,865
Заробак педагогаў у новым навучальным годзе будзе залежаць ад колькасці гадзін і кваліфікацыі, заявіў міністр адукацыі Беларусі Сяргей Маскевіч.
«Рэальны рост заробку педагогаў будзе вызначацца колькасцю гадзін, рэальнай гадзіннай нагрузкай», - паведаміў С.Маскевіч у чацвер на прэс-канферэнцыі ў Менску, каментуючы пастанову ўрада аб падвышэнні на 25% стаўкі педагогам. Пры гэтым міністр падкрэсліў, што «павелічэнне заробку таксама будзе вызначацца узроўнем кваліфікацыі педагога», паведамляе «Інтэрфакс».
Паводле слоў Маскевіча, з улікам падвышэння стаўкі на 25% з 1 верасня малады педагог, да прыкладу, пры нагрузцы гадзін на 1 стаўку будзе атрымліваць на Br100 тыс. больш.
У сувязі з гэтым міністр удакладніў, што «у мінулым навучальным годзе ў сярэднім у краіне нагрузка на 1 педагога складала 22 гадзіны (на тыдзень - ІФ)».
Як адзначыў кіраўнік Мінадукацыі, сума заробку кожнага канкрэтнага педагога будзе залежаць ад таго, колькі ён хоча працаваць.
«Калі ён працуе на адную стаўку або паўстаўкі і асабліва не хоча напружвацца - будзе адзін заробак. Калі ж ён мае большую колькасць гадзін, займаецца з вучнямі дадаткова, то і атрымліваць з новага навучальнага года ён будзе больш», - сказаў міністр.
Пры гэтым Маскевіч нагадаў, што з 1 верасня норма педагагічнай нагрузкі на стаўку падвысіцца з 18 да 20 гадзін у тыдзень.