Аліна Талай выйшла ў паўфінал ЧС па лёгкай атлетыцы

Беларуская спартсменка выйшла ў паўфінал у бегу на дыстанцыі 100 метраў з бар'ерамі.

Аліна Талай - лепшая лёгкаатлетка Беларусі мінулага года - не ўваходзіць у лік відавочных фаварытаў у барацьбе за ўзнагароды. Сёння яна прабегла дыстанцыю за 12,99 сек. З лепшымі вынікамі ў паўфінал выйшлі прадстаўніца ЗША Браяна Ролінс (12,55 сек.), аўстралійка Салі Пірсан (12,62 сек.) і францужанка Сіндзі Білам (12,71 сек.). Паўфінальныя забегі пройдуць у вячэрняй сесіі 17 жніўня, піша БелТА.

Жаночай зборнай Беларусі ў складзе Ганны Рэйшэль (Ташпулатавай), Ілоны Усовіч, Ірыны Хлюставай і Юліі Юрэні не ўдалося выйсці ў фінал эстафеты 4x400 м. Для таго, каб патрапіць у вырашальны забег, патрабавалася пераадолець толькі адзін раунд кваліфікацыі. Беларускі паказалі 10-ы вынік - 3 мін. 30,28 сек. і не трапілі ў васьмёрку фіналістак, хоць і перакрылі свой лепшы час гэтага сезону. Раней іх дасягненне раўнялася 3 мін. 34,14 сек. Лепшы вынік сённяшняй кваліфікацыі належыць зборнай Расеі - 3 мін. 23,51 сек. Другі час дня ў зборнай ЗША (3 мін. 25,18 сек.), трэці - у каманды Ямайкі (3 мін. 25,25 сек.).

У сённяшняй вечаровай спаборніцкай сесіі беларуская спартоўка Марына Арзамасава выступіць у паўфінале на дыстанцыі 800 м. Яна выйдзе на дарожку ў другім забегу. Каб патрапіць у фінал, спартоўка павінна фінішаваць у тройцы лепшых. Пры невыкананні гэтай задачы для выхаду ў галоўны забег вынік павінен апынуцца сярод двух лепшых услед за тымі, якія пакажа першая шасцёрка паўфіналістаў. Пачатак паўфінальных забегаў на 800 м у жанчын у 19.15 паводле беларускага часу.

У іншых відах сённяшняй праграмы беларускія лёгкаатлеты не ўдзельнічаюць. Паводле вынікаў шасці дзён спаборніцтваў лепшым з іх з'яўляецца 4-е месца ў скоках у даўжыню Вольгі Сударавай.