Егіпецкая паліцыя ўзяла штурмам мячэць у цэнтры Каіра (Відэа)

Мячэць Аль-Фатх ў Каіры, дзе ноччу забарыкадаваліся прыхільнікі руху «Браты-мусульмане», пасля доўгага супрацьстаяння ўзялі штурмам сілы бяспекі Егіпта.

Дзясяткі прыхільнікаў Махамеда Мурсі арыштаваныя.

Паводле звестак егіпецкага тэлеканала CBC, у мячэці Аль-Фатх заставалася каля 400 чалавек. Паводле іншых крыніц, там магло быць каля тысячы чалавек.

Ноччу сілы правапарадку распачалі спробу штурму мячэці, але пратэстуючыя адбілі атаку, паведамляе BBC.

Абодва бакі абвінавачваюць адзін аднаго ў выкарыстанні агнястрэльнай зброі, аднак пакуль што няма ніякіх звестак аб ахвярах супрацьстаяння ў мячэці.

Камісар ААН па правах чалавека Наві Пілай заклікала ўрадавыя войскі не выкарыстоўваць зброю супраць маніфестантаў, аднак прызнала, што і другі бок нясе адказнасць за развязванне гвалту.

Мяркуецца, што ў мячэці таксама знаходзяцца трупы загінулых падчас пятнічных сутыкненняў з паліцыяй.

Улады Егіпта паведамілі таксама аб арышце Махамеда Завахіры, брата лідэра «Аль-Каіды», за выступы ў падтрымку зрынутага прэзідэнта Махамеда Мурсі.

Завахіры быў затрыманы на кантрольна-прапускным пункце ў правінцыі Гіза.

Разгон «Маршу гневу»

У пятніцу ў ходзе сутыкненняў прыхільнікаў «Братоў-мусульман» з паліцыяй і войскамі ў розных раёнах краіны загінулі 173 чалавекі. Каля 1 тыс прыхільнікаў «Братоў-мусульман» былі арыштаваныя.

Паводле афіцыйных звестак, акрамя загінуўшых у Каіры не менш за 25 чалавек загінулі ў гарадах, размешчаных у вусце Ніла.

Па ўсёй краіне ў пятніцу праходзіла маштабная акцыя «Марш гневу», арганізаваная ісламісцкіх рухам «Браты-мусульмане», пад час якой заклікалі прыхільнікаў Мурсі выйсці на вуліцы егіпецкіх гарадоў у адказ на разгон палатачных гарадкоў ісламістаў ў Каіры ў сераду.

«Браты-мусульмане» паабяцалі ў пятніцу, што Егіпет чакае тыдзень штодзённых пратэстных акцый па ўсёй краіне.

У сваю чаргу часова выконваючы абавязкі прэм’ера краіны Хазем Беблауі прапанаваў распусціць рух «Браты-мусульмане», чальцы якога патрабуюць вяртання Махамеда Мурсі ў прэзідэнцкае крэсла.

Рух «Браты-мусульмане» знаходзіўся ў Егіпце пад забаронай з 1954 года, аднак не так даўно ён зарэгістраваўся ў якасці няўрадавай арганізацыі.

У выпадку роспуску актывы і нерухомасць «Братоў-мусульман» пяройдуць дзяржаве.

Надзвычайнае становішча

Цяпер у Егіпце дзейнічае надзвычайнае становішча, на вуліцах уведзены каменданцкі час. Міністэрства ўнутраных спраў краіны дазволіла паліцыі выкарыстоўваць баявыя патроны як сродак самаабароны ў выпадку нападаў на ўрадавыя будынкі.

«Марш гневу» павінен быў пачацца па заканчэнні пятнічнай малітвы, аднак людзі пачалі сцякацца да плошчы Рамзес значна раней. Малітва яшчэ толькі пачалася, а вялікая калона ўжо накіроўвалася да цэнтру горада.

Ініцыятары маршу пратэсту заяўляюць, што ён праходзіў пад дэвізам «Народ супраць перавароту», маючы на ўвазе звяржэнне арміяй прэзідэнта Махамеда Мурсі ў пачатку ліпеня.

Паводле паведамленняў карэспандэнта Бі-бі-сі Джэрэмі Боуэн з Каіра, сітуацыя абвастрылася пасля таго, як пратэстоўцы напалі на будынак паліцэйскага ўчастка. Ён бачыў, як у мячэць ля плошчы Рамзеса ўнеслі як мінімум 12 целаў.

«Цярпімасць да жорсткасці»

ЗША пазбягаюць называць звяржэнне Мухамеда Мурсі пераваротам. Па амерыканскіх законах, Вашынгтон абавязаны спыніць любую фінансавую або ваенную дапамогу краіне, у якой адбыўся пераварот.

Сенатар-рэспубліканец Джон Маккейн сказаў, што не разумее, чаму ЗША не выконваюць сваіх уласных законаў.

На яго думку, звяржэнне Мурсі - нішто іншае, як пераварот, і Барак Абама абавязаны называць рэчы сваімі імёнамі і спыніць дапамогу Егіпту.

«Дзеянні Белага дома» дэманструюць памяркоўнасць да жорсткасці, паказваюць мусульманскаму свету, што амерыканскае кіраўніцтва неэфектыўнае, што Злучаныя Штаты Амерыкі патураюць падобным дзеянням. Але мы не можам гэтага дапусціць», - заявіў Маккейн.

У сваю чаргу, ваенныя, зрушыўшы прэзідэнта-ісламіста, сцвярджаюць, што той парушыў абяцанні, якія даваў пры абранні, патаптаў канстытуцыю краіны і спрабаваў узурпаваць уладу, паставіўшы пад пагрозу дэмакратыю і свецкі характар дзяржавы.