«Дажынкі» - не падстава для бязмежжа

Жыхары Жлобіна незадаволеныя тым, у што ператвараюць горад напярэдадні «Дажынак».

На некалькі месяцаў раённы цэнтр Гомельскай вобласці ператварыўся ў суцэльную будаўнічую пляцоўку. Дзень і ноч гудуць трактары, прыходзіцца хадзіць па перарытых дарогах і дыхаць пылам і пяском. Адзенне становіцца брудным пасля гадзіннага шпацыру па жлобінскіх вуліцах, піша «Наша Нiва».

Многія жыхары незадаволеныя. Адны абураюцца, што іх прымушаюць фарбаваць плот за ўласныя грошы, іншыя скардзяцца, што дзіцячыя калыскі не вытрымліваюць выпрабаванняў разбуранымі дарогамі.

Жлобінцы таксама кажуць, што на Беларускім металургічным заводзе амаль удвая скарацілі зарплаты, а больш тысячы работнікаў напісалі заявы аб звальненні.

Журналісты заўважылі ў розных канцах раённага цэнтра надпісы «Дожинки» - не повод беспределить». Яны выказалі здагадку, што іх аўтарамі сталі незадаволеныя гараджане.

Нагадаем, у гэтым годзе першапачаткова планавалася правядзенне фестывалю работнікаў вёскі ў Гомелі, аднак з-за карупцыйнага скандалу, у якім апынуліся замяшанымі чыноўнікі абласнога цэнтра, яго перанеслі.

Старшыня гарвыканкама Жлобіна Уладзімір Дворнік раней заявіў, што на падрыхтоўку горада да «Дажынак», спатрэбіцца каля трыльёна рублёў.