Інфарматару Wikileaks Брэдлі Мэнінгу далі 35 гадоў турмы

У ЗША Ваенны суд прысудзіў інфарматара Wikileaks 25-гадовага радавога амерыканскай арміі Брэдлі Мэнінга да 35 гадоў турэмнага зняволення.

Раней Вайсковы суд ЗША прызнаў вінаватым па 19 пунктах абвінавачванняў і апраўдаў па двух радавога Брэдлі Мэнінга, які перадаў WikiLeaks больш за 700 тысяч старонак засакрэчаных дакументаў Пентагона і Дзярждэпу.

Справа Мэнінга справакавала ў Злучаных Штатах дэбаты аб ролі выкрывальнікаў сакрэтаў і межах паміж шпіянажам і апраўданым паданнем галоснасці дзяржаўных сакрэтаў, паведамляе Расейская служба радыё «Свабода».

23-гадовы радавы Брэдлі Мэнінг, аналітык выведвальнага падраздзялення, раскватараванага на ваеннай базе пад Багдадам, здзейсніў крадзеж сакрэтаў, маштабаў якога не маглі ўявіць нават спецыялісты. Дзівакаваты вайсковец, які быў схільны да нервовых зрываў і апынуўся ў напаўбаявой абстаноўцы толькі з-за дэфіцыту выведнікаў, скапіяваў больш за семсот тысяч старонак баявых данясенняў, дыпламатычных дэпеш, да якіх ён меў доступ па службе, і перадаў іх сайту WikiLeaks.

На пасяджэнні Вашынгтонскага прэс-клуба амаль нікому не вядомы Джуліян Асанж урачыста апублікаваў адзін з першых дакументаў - відэазапіс верталётнай атакі ў Багдадзе, падчас якой быў забіты журналіст і два работнікі інфармацыйнага агенцтва Reuters. Гэты запіс стварыў імя сайту WikiLeaks і самому Асанжу. Следам некалькі газет пачалі публікацыю амерыканскага дыпламатычнага ліставання. Яно часцяком ўтрымлівала бесстароннія, а часам і скандальныя ацэнкі вядомых міжнародных палітычных фігур амерыканскім дыпламатычным корпусам.

Імя арганізатара ўцечкі стала вядома толькі дзякуючы нястрыманасці Мэнінга. Ён не ўтрымаўся ад выхваляння падчас электроннага ліставання з вядомым хакерам, які пакаяўся і звязаўся са сваімі знаёмымі ў ФБР, і Брэдлі Мэнінг быў арыштаваны.

Маштабы крадзяжу сакрэтаў і лёгкасць, з якой ён быў ажыццёўлены, скаланулі спецслужбы і Пентагон. Яны не хавалі свайго жадання ўзорна пакараць Мэнінга, каб перасцерагчы тых, у каго можа быць спакуса пайсці па яго слядах. Менавіта таму, як пагаджаюцца аналітыкі, ваенная пракуратура акрамя абвінавачванняў у парушэнні вайсковага статута і ў шпіянажы прад'явіла Мэнінгу абвінавачванні ў дапамаганні ворагу. Мала таго, яна вырашыла давесці справу да суда, нягледзячы на тое што некалькі месяцаў таму радавы Мэнінг прызнаў сваю віну па большасці інкрымінаваных яму злачынстваў.

Супрацоўніцтва з ворагам, згодна з ваенным кодэксам, караецца або пажыццёвым зняволеннем, або смяротным пакараннем, хоць абвінавачванне аб'явіла, што яно не будзе патрабаваць для Мэнінга смяротнага пакарання. Доказам сувязі абвінавачанага з ворагам, мяркуючы па ўсім, была наяўнасць ва Усамы бен Ладэна некаторых дакументаў, агучаных WikiLeaks.