Тэракты ў Лібане: 42 загінулых, сотні параненых (Відэа)
12- 23.08.2013, 21:30
- 14,693
У горадзе Трыпалі на поўначы Лібана прагрымелі два выбухі.
Загінулі 42 чалавекі, у спісах пацярпелых лічацца ўжо блізу 400 жыхароў Трыпалі, паведамляе BBC.
Адзін з выбухаў адбыўся адразу пасля заканчэння пятнічных малітваў у мячэці Аль-Таква, якую наведвае аўтарытэтны суніцкі прапаведнік шэйх Салем Рафіі. Сам ён не пацярпеў. Многія мяркуюць, што арганізатары выбухаў спадзяваліся яго забіць.
Другі выбух адбыўся праз пяць хвілін у мячэці Аль-Салам.
Праз грамадзянскую вайну ў суседняй Сірыі стасункі паміж сунітамі і алавітамі ў Трыпалі сталі напружанымі.
Шэйх Салем Рафіі - адзін з самых паважаных суніцкіх лідараў у Ліване. Ён выступае супраць шыіцкага руху «Хэзбала» і заклікаў суніцкую моладзь Лівана далучыцца да сірыйскіх паўстанцаў. Паводле некаторых непацверджаных паведамленняў, шэйх Рафіі прамаўляў пропаведзь у мячэці Аль-Таква.
Імам мячэці Аль-Салам таксама з'яўляецца апанэнтам руху «Хэзбала».
Ніхто не ўзяў на сябе адказнасць за гэтыя выбухі. Аналітыкі цяпер асцерагаюцца, што ў Ліване можа пачацца серыя нападаў ў адказ, як гэта адбылося ў Іраку.
Прадстаўнікі «Хэзбалы» асудзілі гэтыя выбухі, заявіўшы, што мэтай іх арганізатараў з'яўляецца спроба пасеяць варожасць сярод розных абшчын лібанцаў.
Прэм'ер-міністр Лібана Наджыб Мікаці і прэзідэнт краіны Мішэль Сулэйман таксама асудзілі гэтыя выбухі і заклікалі жыхароў краіны аб'яднацца супраць гвалту.
У Трыпалі жыве блізу 200 тысяч чалавек. Гэта другі велічынёй горад Лібана. Большасць насельніцтва ў Трыпалі складаюць суніты, яны ў цэлым падтрымліваюць сірыйскую апазіцыю. У горадзе таксама пражываюць алавіты, якія выступаюць у падтрымку прэзідэнта Сірыі Башара Асада.
Тыдзень таму ў шыіцкім раёне Бэйруце быў падарваны аўтамабіль, у выніку чаго загінулі дзясяткі чалавек.
У чэрвені ў выніку баёў паміж сунітамі і алавітамі ў Трыпалі загінулі некалькі дзясяткаў чалавек.
Варожыя бакі ўжывалі гранатамёты, мінамёты і аўтаматы. Баі закранулі шмат якія кварталы горада.