Greenpeace пачаў арктычны паход супраць «Роснефти»
22- 24.08.2013, 19:46
- 26,559
Экалагічная арганізацыя Greenpeace кінула выклік уладам Расеі, парушыўшы забарону на праход свайго ледакола Паўночным марскім шляхам.
Судна «Arctic Sunrise» адправілася ў Карскае мора, дзе «зялёныя» маюць намер пратэставаць супраць асваення арктычнага шэльфа кампаніяй «Роснефть» і яе амерыканскім партнёрам ExxonMobil, паведамляе Radio France Internacional.
Тройчы ўлады Расеі забаранялі ледаколам Greenpeace праход Паўночным марскім шляхам, спасылаючыся на тэхнічныя хібы судна і патрабаванні бяспекі. У суботу 24 жніўня эколагі абвясцілі, што «Arctic Sunrise» адправіўся ў шлях, нягледзячы на забарону, і пакуль не сустрэў расейскіх вайскоўцаў або памежных караблёў.
Актывісты Greenpeace маюць намер правесці акцыю ў Карскім моры, дзе ідзе выведка шэльфа ў рамках нафтагазавых праектаў. Там, у прыватнасці, на замову «Роснефти» праводзіць сейсмічную выведку навуковае судна «Акадэмік Лазараў». Эколагі звяртаюць увагу на небяспеку такой выведкі - з ужываннем магутных сігналаў - для арктычнай фаўны.
Greenpeace пратэстуе супраць праектаў асваення арктычнага шэльфа ў цэлым.
Дзеянні эколагаў неадкладна асудзіў Мінтранс РФ, абвінаваціўшы ледакол, які плавае пад галандскім сцягам, у парушэнні расейскіх і міжнародных законаў.
«Роснефть» на чале з паплечнікам прэзідэнта Пуціна Ігарам Сечыным заявіла ў суботу, што пры працы на арктычным шэльфе кампанія выкарыстоўвае «высокія тэхналогіі», якія гарантуюць «максімальную бяспеку» з пункту гледжання аховы навакольнага асяроддзя.