«Ляпіс Трубяцкі» выпусціць першы альбом на беларускай мове

Гэтай восенню гурт «Ляпіс Трубяцкі» выпусціць альбом «Грай» - першую ў сваёй гісторыі пласцінку, якая складаецца выключна з песень на беларускай мове.

Канцэртная прэзентацыя праекта пройдзе 30 лістапада ў Вільні, піша партал ultra-music.com.

Песні на беларускай сталі важным складнікам творчасці гурта пасля «перазагрузкі» і змены вектару развіцця «Ляпісаў» у 2007 годзе. У гэтых песнях лідар «Ляпіса Трубяцкога» Сяргей Міхалок, як правіла, кажа пра самае важнае для сябе, людзей і краіны. У альбом «Грай» увойдзе 12 беларускамоўных кампазіцый, напісаных і запісаных за апошнія 10 гадоў, у тым ліку 2 абсалютна новых трэка. Але пры гэтым праект разлічаны зусім не толькі на Беларусь і беларускую аўдыторыю.

- Мы ездзім па ўсім свеце і ўсюды сябе пазіцыянуем як гурт з горада-героя Менска, - кажа Міхалок. - Мы спяваем песні на розных мовах, але нам вельмі прыемна, што, калі прыязджаюць у розныя краіны, мы сустракаем людзей, якія разам з намі спяваюць «Рамонкі», «Грай», «Не быць скотам!» і іншыя песні на беларускай мове. Мабыць, гэтыя тэксты і закладзеныя ў іх ідэі блізкія міжнароднай аўдыторыі. Так што гэты альбом прызначаны не толькі для беларусаў ва ўсім свеце, але і для ўсіх, каму цікавая наша музыка, беларуская мова і беларуская культура.

Канцэртная прэзентацыя праекта пройдзе на самай вялікай пляцоўцы Літвы - Siemens Arena у Вільні, якая ўмяшчае 12,5 тысяч гледачоў. Гэта будзе адзінае выступленне «Ляпісаў» з дадзенай праграмай - паўтараць яе калектыў не плануе. У Расеі і іншых краінах «Ляпіс Трубяцкі» працягне тур з праграмай «Lyapis Crew».

Дзякуючы падтрымцы МЗС Літоўскай Рэспублікі, грамадзяне Беларусі, якія набылі квіткі на гэты канцэрт, змогуць атрымаць візу бясплатна. Падача дакументаў спрошчаная - даведкі з месца працы/вучобы і дакументы, якія пацвярджаюць плацежаздольнасць не патрабуюцца.

Між тым, Менскі гарвыканкам наклаў вета на рэкламу канцэрту «Грай». Арганізатары канцэрту ва ўстаноўленым законам парадку забраніравалі каля 20 бігбордаў у Менску, аднак на стадыі сцвярджэння рэкламнага макета ў Камітэце па ідэалогіі гарвыканкама кампанія была забароненая без тлумачэння прычын - нягледзячы на тое, што на афішах і бігбордах гурт «Ляпіс Трубяцкі» нават не згадваўся.