На М2 перавярнуўся ГАЗ з салдатамі-тэрміновікамі

Учора днём на дарозе Менск - Нацыянальны аэрапорт «Менск» перакуліўся ГАЗ-66.

Са слоў карыстальнікаў форуму onliner.by, нібыта машыну з вайскоўцамі падрэзаў легкавы аўтамабіль. Пасля гэтага грузавік з'ехаў у кювет і перакуліўся. У Следчым камітэце Менскай вобласці пацвердзілі факт ДТЗ, удакладніўшы, што праводзіцца праверка.

«Легкавая падрэзала Газон, ён пакуляўся ... ёсць загінулыя, вельмі шкада салдацікаў», - паведаміла на форуме Little_Elis (тут і далей аўтарская арфаграфія і пунктуацыя захаваныя).

«Бачыў аднаго бінтавалі дакладна (шына на назе і галава ў крыві), накрытых не застаў. Будка ГАЗа ў кашу», - напісаў карыстальнік Shtaket626.

- ДТЗ было зарэгістраванае каля Кургана Славы, - удакладнілі ў СК па Менскай вобласці. - Грузавы аўтамабіль, у якім знаходзіліся двое вайскоўцаў тэрміновай службы, перакуліўся. Праводзіцца праверка. Аднаму спатрэбілася шпіталізацыя, іншы пасля аказання неабходнай медыцынскай дапамогі быў адпушчаны. Ступень цяжару пацярпелых выяўляецца.