Менск перадаў матэрыялы справы «Уралкалію» ў Генпракуратуру Расеі
6- 16.09.2013, 15:04
- 13,330
Беларускі бок прыняў рашэнне аб выдзяленні матэрыялаў у дачыненні да расейскіх грамадзян, якія праходзяць па «калійнай справе», у асобную вытворчасць.
Іх перададуць у Генеральную пракуратуру Расеі. Пра гэта паведаміў у панядзелак намеснік генпракурора РФ Аляксандр Звягінцаў, перадае «Інтэрфакс».
«Сёння адбылася тэлефонная размова з генпракурорам Беларусі Аляксандрам Канюком. У ходзе размовы ён паведаміў, што па крымінальнай справе ў дачыненні да ААТ «Уралкалій», якую цяпер расследуюць следчыя органы Беларусі, прынятае рашэнне аб выдзяленні матэрыялаў у дачыненні да грамадзян РФ у асобную вытворчасць і перадачы гэтых матэрыялаў у Генеральную пракуратуру Расеі для арганізацыі далейшага расследавання кампетэнтнымі органамі РФ», - сказаў Звягінцаў.
Паводле яго слоў, такія ўказанні генпракурор Беларусі ўжо даў следчым органам краіны.
Нагадаем, «Уралкалій» апынуўся ў цэнтры міжнароднага скандалу пасля таго, як генеральны дырэктар кампаніі Уладзіслаў Баўмгертнер быў затрыманы ў менскім аэрапорце 26 жніўня пасля сустрэчы з прэм'ер-міністрам Беларусі Міхаілам Мясніковічам. Кіраўніку расейскай кампаніі прад'яўленае абвінавачванне ў злоўжыванні ўладай і службовымі паўнамоцтвамі ў рамках крымінальнай справы аб дзейнасці Беларускай калійнай кампаніі.
Месяцам раней, 30 ліпеня, «Уралкалій» абвясціў аб спыненні экспартных продажаў праз Беларускую калійную кампанію.