Страчаныя хмарачосы Менска

Менску прадказвалі будучыню сучаснага Дубаі, аднак гучныя планы па высотнай забудове не вытрымалі праверкі рэальнасцю.

Некаторыя інвестыцыйныя дамовы былі скасаваныя, іншыя зведалі істотныя змены, а папяровыя Empire State Building на справе апынуліся тыпавымі мапідаўскімі скрынкамі, піша reb.by.

Расчараваўшыся ў ідэі вышыннага будаўніцтва, забудоўшчыкі перасталі спакушаць нас новымі архітэктурнымі вынаходствамі. Здаецца, усе змірыліся, што, акрамя квадратных павільёнаў з таніраванымі вокнамі ў сталіцы ў бліжэйшыя гады наўрад ці што-небудзь з'явіцца. Аднак, некаторыя праекты, заяўленыя ў канцы нулявых, па-ранейшаму застаюцца ў сіле.

Тых, хто не пакінуў планаў скарыць нябёсы, сёння можна пералічыць па пальцах адной рукі. Прадстаўляем іх вашай увазе:

Сёння за званне самага высокага аб'екта на мапе горада змагаюцца дзве новабудоўлі: жылы дом «Ветразь» па вуліцы М.Танка і адміністрацыйна-гандлёвы цэнтр Royal-Plaza на праспекце Пераможцаў. Першы камень абедзвюх высотак быў закладзены яшчэ ў 2008 годзе і з тых часоў тэрміны іх здачы шматкроць пераносіліся. Аднак да фінішу волаты таксама прыйшлі амаль адначасова - абодва павінны быць здадзеныя ў снежні бягучага года. Праўда, забудоўшчык «Ветразя» ўжо зараз прызнаецца, што тэрміны ўводу ў эксплуатацыю прыйдзецца ў чарговы раз пераносіць - на першы квартал 2014 года.

Астатнія планы па-ранейшаму ў сіле. Жылы комплекс «Ветразь» вырасце на 117 метраў ад зямлі, заняўшы 34 паверхі. Plaza саступіць «Ветразю» ўсяго адзін метр, праўда, кампенсуе розніцу шпілем, дзякуючы якому атрымае тытул самага высокага будынка ў сталіцы: агульная вышыня Royal Plaza складзе 135 метраў супраць 133-х ветразных.

Фокус са шпілем, здаецца, не ўваходзіў у першапачатковыя планы забудоўшчыка. Нават на афіцыйным сайце праекта ўсё яшчэ значыцца 130-метровая вышыня. Але прадстаўнікі кампаніі «Ітэра» падкрэсліваюць, што даўжыня шпіля не была вызначаная праектнай дакументацыяй, пра яе ўпершыню загаварылі толькі ў мінулым годзе.

І калі ў «Ветразі» ўсяго будзе ў меру - 204 кватэры, 203 машынамесцы плюс некалькі тысяч квадратаў офісных і камерцыйных плошчаў, то Royal Plaza пагражае праспекту Пераможцаў чарговай транспартнай напругай: у вышыннага дому зусім не будзе ўласнага паркінгу. Забудоўшчыкі збіраюцца заклікаць на дапамогу плоскасную паркоўку, якая будзе пабудаваная ўздоўж вуліцы Замкавай, а гэтак жа паркінг комплексу «Galeria». Аднак, рослая Plaza будзе ўведзеная ў эксплуатацыю ўжо праз некалькі месяцаў, а машынамесцы падцягнуцца яшчэ не хутка.

Тут жа, на праспекце Пераможцаў, вырасце яшчэ адзін волат - 40-павярховая гасцініца ў рамках жылога комплексу «Лябяжы». І, калі «Ветразь» і «Royal Plaza» могуць насіць званне «хмарачосы» толькі ў кантэксце суровых беларускіх рэалій, то гасцініца ў «Лябяжым» ушчыльную наблізіцца да гэтага тытулу ўжо па еўрапейскай класіфікацыі. На захадзе хмарачосам клічуцца будынкі ад 150 метраў у вышыню. Гасцініца ў «Лябяжым» возьме 145-метровую адзнаку.

Першыя эскізы гасцініцы нагадвалі сталінскі гмах на Кацельніцкай набярэжнай у Маскве:

Але за мінулыя гады праект зведаў істотныя змены. У выніку без-пяці-метраў-хмарачос было вырашана аформіць традыцыйным танаваным шклом, куды больш звыклым для беларускіх вачэй:

40-павярховы гасцінічны комплекс будзе змяшчаць 250 нумароў, элітнае жыллё, офісныя памяшканні і аб'екты сацыяльнай інфраструктуры. Услед за гасцініцай уздоўж праспекта Пераможцаў гуськом выбудуюцца жылыя 25-павярхоўкі:

Калі б будынак паспелі пабудаваць у тэрмін, ужо ў 2014 годзе яго шпіль стаў бы самай высокай кропкай на мапе сталіцы. Аднак на сённяшні дзень гасцініцы далёка да такіх вышынь: яна ледзь пераадолела нулявы цыкл.

Падобны лёс напаткаў комплекс «Менскія вежы», якія стануць першымі безумоўнымі хмарачосамі ў гісторыі горада. Забудоўшчык абяцаў пачаць будаўніцтва да канца 2012 года, але да гэтага часу не пераадолеў падрыхтоўчы этап.

Архітэктурны ансамбль з трох вежаў з заломам павінен быў упрыгожыць вуліцу Філімонава ўжо ў 2015 годзе пры ўмове, што ўсё пойдзе па плане. Ад планаў, аднак, забудоўшчык бязбожна адстаў, таму на пятнаццаты год разлічваць не прыходзіцца.

Тым не менш, праект аказаўся куды больш жыццяздольным, чым меркавала беларуская публіка. У 2010 годзе амбіцыйная задума была сустрэтая з пэўнай доляй іроніі. Памятаючы пра тое, што гучныя абяцанні зрабіць з Менска сучасны Дубаі часта выліваліся ў чарговую тыпавую забудову, блогер Darriuss публікуе вось такі фэйкавы рэндэр:

Малюнак сімвалізуе эвалюцыю праекта сучасных хмарачосаў у чарговыя мапідаўскія скрынкі. Але, насуперак прадказанням, праект быў зацверджаны гарадскімі ўладамі менавіта ў тым выглядзе, у якім яго задумвалі заморскія архітэктары.

«Сямейка» вежаў, як яе ўжо ахрысціў забудоўшчык, будзе складацца з двух хмарачосаў 162- і 166-метровай вышыні і яшчэ аднаго будынка падобнай канфігурацыі, праўда куды больш сціплага росту - 57 метраў:

У самай маленькай вежы плануецца размясціць ужо традыцыйны для сталіцы гандлёва-забаўляльны набор: рэстараны, фітнес-цэнтр, аквапарк і казіно. У сярэдняй - офісныя і гандлёвыя плошчы. Самая высокая вежа адведзеная пад гасцініцу павышанай катэгорыі з «люксамі» на верхніх паверхах. Па словах забудоўшчыка, праект аўстрыйскіх архітэктараў не мае аналагаў у свеце: першапраходцы сярод беларускіх хмарачосаў, вежы стануць яшчэ і сусветным ноў-хаў, бо да гэтага часу чалавецтву не давялося ўзводзіць такія будынкі з заломам:

«Мы разумелі, што выбралі самую складаную і цяжкую ў выкананні ідэю, але гэта быў свядомы крок [...] Наша задача складалася ў тым, каб не паўтараць традыцыйныя і звыклыя вобразы хмарачосаў у выглядзе шпіляў, «чамаданаў», цыліндраў, а знайсці індывідуальнае рашэнне, якое было б прыкметай новай эпохі, нейкім адлюстраваннем архітэктурнага залому, што сімвалізуе пераход да новай свядомасці, новага мыслення і сучаснага прачытання нашага часу», - распавядае генеральны дырэктар СП «Аляксандраў-Пасаж» Алег Дзенісюк.

Складана не заўважыць, што шэрагі інвестараў, якія жадаюць рэалізаваць такія амбіцыйныя праекты, прыкметна парадзелі з 2010 года.