Баўмгертнера могуць выдаць Расеі для следчых дзеянняў
20- 16.09.2013, 16:36
- 17,996
Пасля перадачы ў Генпракуратуру РФ матэрыялаў па справе «Уралкалію» ў дачыненні да расейскіх грамадзян паўстане пытанне аб выдачы Уладзіслава Баўмгертнера Расеі.
Пра гэта паведаміла ў панядзелак «Інтэрфаксу» крыніца, знаёмая з сітуацыяй.
«Як толькі расейскія следчыя атрымаюць матэрыялы ад сваіх беларускіх калегаў , можа паўстаць пытанне аб выдачы Баўмгертнера ў Маскву для выканання следчых дзеянняў», - сказаў суразмоўца агенцтва.
Разам з тым ён не выключыў, што на нейкім этапе следчыя з Расеі змогуць прыехаць у Менск для працы на месцы з гендырэктарам «Уралкалію».
«Пытанне аб выдачы Баўмгертнера будзе вырашацца ў ходзе перамоваў паміж дзвюма пракуратурамі і, магчыма, на палітычным узроўні», - адзначыла крыніца.
Раней у панядзелак намеснік генпракурора РФ Аляксандр Звягінцаў паведаміў, што беларускі бок прыняў рашэнне вылучыць матэрыялы ў дачыненні да расейскіх грамадзян, якія праходзяць па «калійнай справе», у асобную вытворчасць і перадаць іх у Генеральную пракуратуру Расеі.
«Сёння адбылася тэлефонная размова з генпракурорам Беларусі Аляксандрам Канюком. У ходзе размовы ён паведаміў, што па крымінальнай справе ў дачыненні да ААТ «Уралкалій», якую цяпер расследуюць следчыя органы Беларусі, прынятае рашэнне аб выдзяленні матэрыялаў у дачыненні да грамадзян РФ у асобную вытворчасць і перадачы гэтых матэрыялаў у Генеральную пракуратуру Расеі для арганізацыі далейшага расследавання кампетэнтнымі органамі РФ», - сказаў Звягінцаў.
Паводле яго слоў, такія ўказанні генпракурор Беларусі ўжо даў следчым органам рэспублікі.
Генеральны дырэктар «Уралкалію» і кіраўнік назіральнага савета «Беларускай калійнай кампаніі» (БКК) У.Баўмгертнер быў затрыманы ў канцы жніўня ў Менску. Следчы камітэт Беларусі прад'явіў яму абвінавачанне ў злоўжыванні службовымі паўнамоцтвамі, магчымая санкцыя - пазбаўленне волі на тэрмін да дзесяці гадоў.
За месяц да гэтага «Уралкалій» у канцы ліпеня заявіў пра спыненне экспартных продажаў праз БКК - сумеснага трэйдара з «Беларуськаліем».
Фота: РІА «Новости»