Баўмгертнера могуць вызваліць пад заклад у $100 мільёнаў
39- 19.09.2013, 17:56
- 23,264
Пытанне аб вызваленні гендырэктара ААТ «Уралкалій» Уладзіслава Баўмгертнера і вяртанні ў Расею можа вырашыцца ў бліжэйшы час.
Пра гэта паведамілі «Інтэрфаксу» ў чацвер крыніцы, знаёмыя з сітуацыяй.
«У цяперашні час разглядаюцца некалькі варыянтаў вызвалення У.Баўмгертнера, у тым ліку і пад буйны грашовы заклад», - сказаў адзін з суразмоўцаў агенцтва.
Паводле яго дадзеных, беларускі бок на днях прапанаваў Баўмгертнеру і яго адвакатам змяненне меры стрымання - арышту - на грашовы заклад у памеры $100 млн.
Іншая крыніца паведаміла, што перспектывы вызвалення альбо перадачы расейскім праваахоўным органам кіраўніка «Уралкалію» абмяркоўваюцца паміж прадстаўнікамі Генпракуратуры Беларусі і РФ.
З мінулай серады ў Менску знаходзіцца намеснік генпракурора РФ Аляксандр Звягінцаў.
«У цэнтры перамоваў - перспектывы расследавання справы «Уралкалію» і пытанне перадачы матэрыялаў справы расейскаму боку для далейшага расследавання», - адзначыў суразмоўца агенцтва.
Ён не выключыў, што ўжо ў бліжэйшы час Генпракуратура Расеі атрымае ад беларускіх калегаў частку крымінальнай справы, якая тычыцца фігурантаў справы - расейскіх грамадзян, сярод якіх асноўны ўладальнік найбуйнейшай кампаніі па вытворчасці мінеральных угнаенняў Сулейман Керымаў і яе гендырэктар Баўмгертнер.