Мінфін прапаноўвае падняць акцызы на алкаголь і тытунь

Міністэрства фінансаў Беларусі скарэктавала прапановы па павелічэнні ставак акцызаў на алкаголь і тытунь у 2014 годзе.

Рост акцызаў на алкаголь будзе паэтапным. Дадзеная прапанова ўтрымліваецца ў абноўленым праекце закона «Аб унясенні змяненняў і дапаўненняў у Падатковы кодэкс Рэспублікі Беларусь», піша «Інтэрфакс».

Дакументам прадугледжваецца паэтапны рост ставак акцызаў на некаторыя найменні алкагольнай прадукцыі. У прыватнасці, з 1 студзеня 2014 года стаўка акцызу на алкагольную прадукцыю з аб'ёмнай доляй этылавага спірту 7% і больш складзе Br118 тыс. (тут і далей - у разліку на 1 літр 100%- га этылавага спірту ў прадукцыі), што на 12,9% больш цяпер дзеючай стаўкі акцызу. З 1 ліпеня дадзеная стаўка будзе павышаная яшчэ на 12,7% да Br133 тыс. Раней праектам прадугледжвалася аднамомантавае павышэнне акцызу на 27,3% да Br133 тыс.

Паэтапнае павышэнне стаўкі акцызу таксама чакае віны пладовыя мацаваныя марачныя: з 1 студзеня стаўка акцызу складзе Br65 тыс. (на 29,5% больш стаўкі, якая дзейнічае цяпер), з 1 ліпеня - рост яшчэ на 16,2% да Br75,5 тыс. Раней прапаноўвалася аднамомантавае павышэнне стаўкі акцызу ў 2,1 раза да Br106,4 тыс.

З 1 студзеня 2013 года стаўка акцызу на харчовы этылавы спірт складзе Br32,9тыс. (на 13% больш), з 1 ліпеня - Br37 тыс. (на 12,5% больш).

Стаўкі акцызаў на астатнія алкагольныя напоі і піва прапануецца павысіць адначасова. Так, памер акцызу на натуральныя віны фруктова-ягадныя і фруктова-ягадныя сідры будзе павялічаны на 9% да Br850 тыс. (за 1 літр гатовай прадукцыі), на натуральныя віны, у тым ліку шампанскія і пеністыя - на 10,6% да Br5,2 тыс.

Слабаалкагольныя натуральныя напоі, згодна з дакументам, з 1 студзеня будуць абкладацца акцызам у памеры Br69,7 тыс. (у разліку на 1 літр 100%- га этылавага спірту ў прадукцыі), што на 10% больш дзеючай стаўкі.

Стаўка акцызу на піва з утрыманнем аб'ёмнай долі этылавага спірту ад 0,5% да 7%, а таксама на піўныя кактэйлі павялічыцца на 10,3% да Br3,2 тыс. за 1 л, на піва з утрыманнем аб'ёмнай долі этылавага спірту ад 7% - на 10,3% да Br6,4 тыс.

Акрамя таго, Мінфін адкарэктаваў памер стаўкі акцызу на цыгарэты ў бок змяншэння. У прыватнасці, з 1 студзеня 2014 года стаўка акцызу на цыгарэты I групы за 1 тыс. шт. складзе Br125 тыс., што на 24,5% больш бягучай стаўкі акцызу.

Памер акцызу на цыгарэты II групы будзе павялічаны на 19% да Br215 тыс., на цыгарэты без фільтра і папяросы - на 55,8% да Br93,8 тыс.

Раней Мінфін прапаноўваў павысіць стаўкі на цыгарэты I групы на 45% да Br145 тыс., цыгарэты II групы - на 54,2% да Br247,6 тыс., на цыгарэты без фільтра і папяросы - на 81,4% да Br109,2 тыс.

Прапановы па павелічэнні памераў ставак акцызаў на іншыя тытунёвыя вырабы засталіся ранейшымі.