Мадура змагаецца з дэфіцытам туалетнай паперы
69- 21.09.2013, 8:03
- 23,954
Урад Венесуэлы часова нацыяналізаваў фабрыку па вытворчасці туалетнай паперы ў сувязі з дэфіцытам яе прадукцыі ў краіне.
Нацыянальнай гвардыі, якая ачапіла тэрыторыю завода, даручана кантраляваць вытворчасць і пастаўкі прадукцыі на рынак, паведамляе BBC.
У краіне назіраецца дэфіцыт прадуктаў і тавараў першай неабходнасці, апазіцыя вінаваціць у сітуацыі, якая склалася, улады краіны.
Урад жа ўскладае віну на «нядобрасумленных гандляроў». На мінулым тыдні прэзідэнт Венесуэлы Нікалас Мадура стварыў спецыяльную камісію для развязання праблемы дэфіцыту. Апошнім часам ён усё часцей тлумачыць розныя праблемы ў Венесуэле сабатажам з боку правых сіл. Нядаўна Нікалас Мадура заявіў аб нібыта наяўных планах рэалізаваць у кастрычніку падрыхтаваную звонку змову супраць краіны і заклікаў народ быць гатовым да правакацый.