Міліцыя спаралізавала працу менскага метро
143- 23.09.2013, 14:19
- 180,198
Станцыі «Кастрычніцкая» ды «Плошча Якуба Коласа» былі закрытыя.
Першыя паведамленні аб падвышаных мерах бяспекі ў Менскім метрапалітэне з'явіліся ў сацыяльных сетках прыкладна апоўдні. Шмат якія менчукі напісалі пра дагляд пасажыраў на сваіх старонках у «Твітэры». Праверку асабістых рэчаў праводзілі супрацоўнікі міліцыі на некалькіх станцыях метрапалітэна.
«Станцыя метро «Каменная горка»: ва ўсіх людзей міліцыя правярае сумкі, - піша @arina0__0 і дадае, што тое ж самае адбывалася на «Магілёўскай».
«На «Парку чалюскінцаў» аналагічна», - паведамляе @BigBadDev.
«Таксама на «Першамайскай», - дадае @grd12by. Ён адзначае, што праверку праводзілі не шараговыя міліцыянты, а «вялікія начальнікі».
«Сёння раніцай у мужчыны на станцыі метро «Уручча» металадэтэктарам нават па парасоне праводзілі», - піша @stanfursov.
Праз праверку на некаторых станцыях узніклі вялізныя чэргі. Шмат хто з менчукоў публічна абураліся дзеяннямі міліцыянтаў.
Крыху пазней з'явілася інфармацыя аб тым, што станцыя метро «Плошча Якуба Коласа» закрытая. Цягнікі на ёй не спыняліся, а людзей на станцыю не пускалі. Аб гэтым, у прыватнасці, паведаміў карыстальнік @123RaZoR321. У той жа час, на суседніх станцыях назіралася вялікая колькасць супрацоўнікаў міліцыі і амапаўцаў.
Праз паўгадзіны станцыя «Кастрычніцкая» таксама была закрытая. Каля ўваходу на яе стоўпіліся дзясяткі пасажыраў, якія не змаглі трапіць у метро. Перад гэтым у цэнтры горада пачуўся гучны гук сірэны.
Шмат хто звязвае перапалох, справакаваны міліцыяй, з вучэннямі «Захад -2013», якія пачаліся 22 верасня. Адна з заяўленых мэтаў беларуска-расейскіх манеўраў - барацьба з тэрарыстычнай пагрозай.
А 14:05 у Менскім метрапалітэне сайту charter97.org паведамілі, што не ведаюць пра прычыны праверак. «Мы да гэтага не маем ніякага дачынення», - сказала супрацоўніца. Праз гадзіну ў метро сказалі, што на станцыі «Плошча Якуба Коласа» была выяўленая безгаспадарная торба.
У аддзеле ўнутраных спраў Менскага метрапалітэна наогул адмовіліся каментаваць тое, што адбываецца.
А 16:51 аператыўны дзяжурны МНС сказаў сайту charter97.org, што «выбухованебяспечных прадметаў на станцыі «Плошча Якуба Коласа» не знойдзена». Пасля гэтага станцыю адкрылі для пасажыраў.
МНС і МУС толькі пасля 17:00 раскрылі прычыну перапалоху, учыненага ў метро. Высветлілася, прычынай гэтаму, сапраўды, сталі вучэнні.
«У метро праходзяць вучэнні», - паведаміла прэс-служба МНС.
«Вучэнні праходзяць ва ўмовах, максімальна набліжаных да рэальных. Метро гэта пацвердзіла», - паведамілі ў МУС.
Нагадаем, пасля выбуху, што прагрымеў на станцыі метро «Кастрычніцкая» ў 2011 годзе, міліцыя паабяцала ўзмацніць меры бяспекі ў метро. Пасажыраў з вялікімі сумкамі сталі выбарачна даглядаць. У пачатку гэтага года галоўны рэвізор бяспецы КУП «Менскі метрапалітэн» Аляксандр Салей паведаміў, што бліжэйшым часам на некаторых станцыях з'явяцца новыя комплексы для надгляду пасажыраў.