Сіноптыкі папярэдзілі аб начных замаразках
6- 23.09.2013, 15:30
- 19,553
У Беларусі на гэтым тыдні захаваецца няўстойлівае надвор'е.
Да канца дня дажджы пройдуць у многіх раёнах. Дзе-нідзе магчымыя навальніцы. На большай частцы тэрыторыі будзе ўзмацняцца вецер. Максімальная тэмпература паветра складзе 9..+14°С, па Брэсцкай вобласці паветра прагрэецца да +16°С цяпла, піша pogoda.by.
У бліжэйшыя суткі, 24 верасня, умовы надвор'я ў нашай краіне будзе вызначаць халодная тылавая частка цыклону над Цэнтральнымі раёнамі Еўрапейскай Расеі. Чакаецца воблачнае з праясненнямі надвор'е. У многіх раёнах пройдуць кароткачасовыя дажджы, ноччу месцамі па Магілёўскай і Гомельскай абласцях дажджы будуць моцныя. Вецер паўночна-заходні, паўночны, у многіх раёнах яго парывы будуць дасягаць 15-20 м/с. Гэтай ноччу тэмпература паветра +5..+11°С, заўтра днём ад 8°С да 14°С цяпла. Атмасферны ціск ноччу будзе падаць, раніцай і днём інтэнсіўна расці.
У наступныя двое сутак, 25 і 26 верасня, тэрыторыя Беларусі працягне знаходзіцца ў халоднай тылавой частцы цыклона, які змяшчаецца з цэнтральных на паўночныя раёны еўрапейскай Расеі. У выніку чаго характар надвор'я не зменіцца. Будзе ветрана і халаднавата.
25 верасня ноччу месцамі, днём на большай частцы пройдуць кароткачасовыя дажджы. Вецер паўночна-заходні, заходні ўмераны, днём па ўсходзе месцамі моцны парывісты. Тэмпература паветра ўначы +2..+7°С, днём +7..+13°С.
26 верасня месцамі па рэспубліцы, а днём па Гродзенскай і Брэсцкай абласцях на большай частцы кароткачасовыя дажджы. Вецер заходні, паўночна-заходні ўмераны, у асобных раёнах парывісты. Тэмпература паветра ноччу +1..+6°С, месцамі замаразкі да 0..-3°С, днём +6..+11°С.