Правілы «Еўрабачання» зрабілі больш жорсткімі
- 23.09.2013, 16:51
- 17,477
Конкурс папулярнай музыкі «Еўрабачанне» абвясціў аб змене правілаў галасавання.
Пра гэта паведамляецца на афіцыйным сайце конкурсу. У першую чаргу змяненні закрануць сістэму галасавання нацыянальных журы краін-удзельніц.
Склад нацыянальнага журы з гэтага часу павінен быць абнародаваны 1 траўня - за некалькі дзён да першага паўфіналу конкурсу. Раней ён не выдаваўся аж да фіналу «Еўрабачання». Акрамя таго, згодна з новымі правіламі, пасля фіналу будуць апублікаваныя вынікі галасавання кожнага асобнага прадстаўніка нацыянальнага журы на ўсіх этапах конкурсу, піша Lenta.ru.
Таксама аргкамітэт «Еўрабачання» прапанаваў унесці карэктывы ў фармаванне складу нацыянальнага журы. Суддзямі па-ранейшаму могуць станавіцца прафесіяналы з музычнай індустрыі і зоркі шоў-бізнесу, але пры ўмове, што яны не былі членамі журы ў мінулым ці пазамінулым годзе.
Эксперты мяркуюць, што ўзмацненне жорсткасці правілаў можа ў далейшым спыніць якія-небудзь маніпуляцыі з галасаваннем.
З нагоды галасавання на «Еўрабачанні» неаднаразова ўзнікалі скандалы. У прыватнасці, у 2013 годзе прадстаўнікі некаторых краін, у тым ліку Расеі і Беларусі, паскардзіліся на некарэктны падлік галасоў і магчымы подкуп членаў журы.
У некарэктных паводзінах і агітацыі за пэўнага ўдзельніка абвінавачвалі расейскага спевака Філіпа Кіркорава. Прадстаўнікі «Еўрабачання» адзначылі, што Кіркораў публічна агітаваў за азербайджанскага канкурсанта Фарыда Мамедава і рабіў гэта не ўпершыню. Раней, падчас «Еўрабачання-2009», якое праходзіла ў Маскве, спявак адкрыта заклікаў галасаваць за нарвежскага ўдзельніка Аляксандра Рыбака.