Валерый Фралоў: У метро сапраўды нешта адбылося

Генерал упэўнены, што ўчора ў менскім метро не было вучэнняў.

Інфармацыю, якая ўжо ўвечары з'явілася на афіцыйным сайце ГУУС Менгарвыканкама пра тое, што «супрацоўнікі праваахоўных органаў спрабавалі выявіць і абясшкодзіць умоўную выбуховую прыладу», Валерый Фралоў лічыць сумнеўнай, піша «ЕўраБеларусь».

«Калі гэта не з'яўлялася часткай вучэнняў «Захад-2013», а было мерапрыемствам, якое праводзілася па Менску і ў рамках чагосьці іншага, то я не думаю, што нават у гэтым выпадку падобныя дзеянні павінны праводзіцца такім чынам, каб выклікаць паніку сярод людзей», - упэўнены генерал.

На яго думку, «хутчэй за ўсё ў метро сапраўды адбылося нешта нечаканае і непрыемнае, у выніку чаго потым давялося прымаць меры і знаходзіць гэтаму нейкае тлумачэнне, паколькі людзі звычайна вельмі бурна рэагуюць на такія пазаштатныя сітуацыі».

Ускосным пацвярджэннем версіі аб рэальнасці надзвычайнага здарэння можа служыць і тое, што ў распараджэнні журналістаў практычна адразу пасля першых паведамленняў аб НЗ у менскім метрапалітэне апынуўся аўдыёзапіс перамоваў паміж супрацоўнікамі праваахоўных органаў, у якім паведамлялася пра тое, што «адшукваюцца трое меркаваных злачынцаў, якія падазраюцца ў падрыхтоўцы і здзяйсненні тэракту ў горадзе Менску, як мяркуецца, на аб'ектах метрапалітэна шляхам прывядзення ў дзеянне выбуховай прылады».

У гэтай жа размове гаворка ішла аб цалкам канкрэтных асобах і аб вельмі дакладных дэталях: «Жанчына славянскай знешнасці, на выгляд 18-28 гадоў, рост - каля 160 сантыметраў, хударлявага целаскладу, валасы светлыя фарбаваныя, мае асіметрычную прычоску: з аднаго боку коратка стрыжаныя, з другога - доўгія. Мужчына першы: славянскай знешнасці, узрост 18-20 гадоў, рост каля 190 сантыметраў, хударлявага целаскладу, валасы русыя, сярэдняй даўжыні. Мужчына другой: славянскай знешнасці, узрост 18-28 гадоў, каля 175 сантыметраў, сярэдняга целаскладу, вочы глыбока пасаджаныя, бровы густыя шырокія, валасы чорныя сярэдняй даўжыні. Могуць знаходзіцца пад уздзеяннем псіхатропных альбо наркатычных прэпаратаў. Прылада можа быць запакаваная як у сумку , так і ў поліэтыленавы пакет. Усіх падобных па прыкметах аглядаць, выконваючы меры засцярогі».

«Такая інфармацыя наўрад ці магла распаўсюджвацца ў рамках нейкіх вучэнняў, - перакананы Валерый Фралоў. - Хутчэй за ўсё, гаворка ішла пра сапраўды падазроных асоб, абвешчаных у вышук. Гэта магло стаць праявай залішняй пільнасці з мэтай паказаць страшную заклапочанасць станам бяспекі ў Менску. У любым выпадку я не думаю, што гэта магло быць запланаваным мерапрыемствам».

Калі выказаць здагадку, што ўзнікненне пазаштатнай сітуацыі ў метрапалітэне не было запланаваным і там сапраўды адбыўся нейкі інцыдэнт, то ўзнікаюць пытанні, па якіх прычынах пасля гэтага так доўга не было дакладнай інфармацыі з нагоды таго, што здарылася, і чаму ў выніку людзям паведамілі пра нібыта паспяхова праведзеныя дзеянні, запланаваныя загадзя?

«Справа ў тым, што ў краіне як раз адсутнічала ў гэты час асоба, якая і прымае ўсе рашэнні па такіх экстраных нагодах, - мяркуе Валерый Фралоў. - І да таго часу, пакуль галоўны чалавек у краіне не ацэніць сітуацыю, у нас вельмі часта пачынаюць адкрыта несці ўсякую лухту. Нават вельмі вялікія чыноўнікі ў нас не могуць выказацца з любой сур'ёзнай нагоды, таму што ўсе баяцца за наступствы. Не выключаю, што праз некалькі дзён асабіста Аляксандр Рыгоравіч выразна і ясна ўсім раскажа, як усё было на самой справе. А да гэтага часу ўсе будуць сядзець перапуджаныя! Яны ж усе жывуць па прынцыпе, што ў нас толькі адзін мудры беларус у краіне, таму і сядзяць зашуганыя, толькі брэшуць часам, як сабакі ад страху, баяцца нешта лішняе сказаць і апынуцца ў двухсэнсоўным становішчы».

Нават калі паверыць у інфармацыю аб паспяховай нейтралізацыі ўмоўнага выбуховага прыстасавання, пра што запознена паведамілі ў ГУУС Менгарвыканкама, выклікае некаторае здзіўленне тое, што нейкі час ні ў сталічным ГУУС, ні ў дзяжурнай частцы метрапалітэна, ні ў МНС, ні ў МУС не давалі ніякіх каментароў з нагоды інцыдэнту ў сталічным метро. Гэта спарадзіла масу здагадак і чутак ў сацыяльных сетках. Людзі сур'езна ўзяліся абмяркоўваць самыя розныя версіі таго, што адбылося, у панядзелак у сталічным метро - ад здагадак аб тым, што дзяржава ўсё часцей дэманструе свае маразматычныя схільнасці, да ўпэўненасці ў тым, што грамадзян краіны папросту дэзынфармуюць час ад часу з мэтай адцягнення грамадскай увагі ад іншых, больш сур'ёзных праблем і інфармацыйных нагодаў.

«Я больш схільны да версіі аб тым, што гэта праявы маразму, - кажа генерал Фралоў. - Маразм з элементамі баязлівасці і перапуджанасці, калі некаторыя людзі самі могуць нешта зрабіць і баяцца гэтага. Гэта такая агульнанацыянальная зашуганасць, а не вучэнні ніякія».

Нагадаем, учора ў цэнтры Менска, у гадзіну пік сталічная міліцыя нібыта правяла вучэнні ў метрапалітэне, што выклікала сапраўдную паніку сярод грамадзян. У раёне 16-17 гадзін у раёне Кастрычніцкай плошчы ў Менску сталі чутныя бесперапынныя сігналы сірэны, былі заўважаныя перамяшчэнні байцоў спецыяльных падраздзяленняў, у падземных пераходах былі ўзмоцненыя меры бяспекі і кантролю, а станцыя метро «Плошча Якуба Коласа» апынулася закрытай для пасажыраў.

У гэты ж час у некаторых установах аховы здароўя Менска сталі рыхтавацца да прыёму параненых, быццам бы пацярпелых у выніку тэракту.